I shpëtoi drejtësisë për gjashtë vjet: Arrestohet në Greqi shqiptari i akuzuar për vrasjen e bashkatdhetarit në Selanik

Autoritetet greke kanë prangosur një 26-vjeçar nga Shqipëria, i cili ishte shpallur në kërkim ndërkombëtar si autor i dyshuar për një krim të rëndë të ndodhur katër vite më parë. I arrestuari është identifikuar si Romarjo Tahiri, ndërsa kapja e tij është finalizuar me sukses në kuadër të operacionit policor të koduar “The Wanted”. Sipas dosjes hetimore, ngjarja tragjike daton në vitin 2020 në qytetin e Selanikut, ku mbeti i vrarë shtetasi shqiptar Spartak Dervishi. Nga hetimet paraprake dyshohet se Tahiri ka vepruar në bashkëpunim me dy persona të tjerë, duke e dhunuar fillimisht viktimën dhe më pas duke i marrë jetën me mjete prerëse. Në lidhje me këtë ngjarje kriminale, Gjykata e Korçës kishte lëshuar në vitin 2021 masën e sigurisë “Arrest në burg” ndaj të riut, për veprën penale të “Vrasjes me dashje” të kryer në bashkëpunim, vendim ky që i hapi rrugë lëshimit të urdhër-arresti ndërkombëtar. Tashmë që kreu i dyshuar i kësaj ngjarjeje është vënë në pranga në territorin grek, institucionet kompetente në Shqipëri kanë vënë në lëvizje mekanizmat zyrtarë për të kryer procedurat e nevojshme për ekstradimin e tij drejt vendit tonë.