Inaugurohet Oda Folklorike Shqiptare në Cyrih, ambasadori Demiri: Trashëgimia jonë kulturore duhet trashëguar brez pas brezi

RÜMLANG, CYRIH, 31 tetor 2026 – Në një ambient festiv dhe me një pjesëmarrje të gjerë të aktivistëve, figurave të shquara dhe bashkatdhetarëve nga të gjitha trojet, ambasadori i Republikës së Maqedonisë së Veriut në Zvicër, Shkëlqesia e Tij, Rexhep Demiri, ka marrë pjesë në ceremoninë solemne të përurimit të Odës Folklorike Shqiptare në Zvicër, ngjarje kjo e organizuar në Rümlang të Cyrihut. Krahas diplomatit Demiri, në këtë mbrëmje ishte i pranishëm edhe shefi i Konsullatës së Përgjithshme të Republikës së Kosovës në Cyrih, z. Vigan Berisha, prani e cila i dha një dimension më të gjerë diplomatik ngjarjes, duke pasqyruar marrëdhëniet e shkëlqyera, respektin reciprok dhe partneritetin ndërmjet Kosovës dhe Maqedonisë së Veriut. Njëkohësisht, ky bashkëpjesëmarrje dëshmoi qartë se mbrojtja dhe lartësimi i identitetit kulturor shqiptar në diasporë mbeten shtylla që bashkojnë mbarë komunitetin. Me rastin e këtij organizimi, kryediplomati Rexhep Demiri ndau përshtypjet e tij përmes një deklarate: “Dje patëm privilegjin dhe kënaqësinë të ishim pjesë e hapjes solemne të Odës Folklorike Shqiptare në Zvicër, në Rümlang të Cyrihut. Ky projekt me peshë përfaqëson një gur milje për mbrojtjen, zhvillimin dhe përhapjen e melosit folklorik, si dhe të trashëgimisë sonë të pasur shpirtërore dhe tradicionale, e cila përbën një pasuri të pacenueshme që kërkon kujdes dhe përcjellje te brezat e ardhshëm. Kënga folklorike është jehona e së shkuarës sonë, thelbi i identitetit tonë dhe një urë lidhëse e fuqishme që mban gjallë kontaktin e gjeneratave të reja me gjenezën e tyre kulturore. Përmes nismave të tilla domethënëse, traditat tona vazhdojnë të lulëzojnë dhe të marrin hapësirën e merituar edhe larg vendlindjes. Falenderojmë nga zemra organizatorët për ftesën, mikpritjen e ngrohtë dhe vlerësimin e treguar. I dëshirojmë Odës Folklorike Shqiptare në Zvicër punë të mbarë, suksese të pandërprera dhe arritje kulmore në misionin e tyre për ruajtjen e vlerave tona kombëtare!” Themelimi i kësaj ode në Zvicër shënon një kthesë domethënëse në organizimin institucional dhe mbrojtjen e pasurisë kulturore shqiptare jashtë kufijve. Angazhimi dhe mbështetja e hapur e trupit diplomatik në ngjarje të këtij niveli dëshmojnë peshën e madhe që ka bashkërendimi i forcave në funksion të ruajtjes së identitetit, traditës dhe bashkësisë sonë kombëtare.