Mourinho thyen heshtjen: Mbështetje totale për Mbappe-n pas stuhisë në Kinë

Trajneri i Real Madridit, Jose Mourinho, ka dalë në mbrojtje të sulmuesit të tij, Kylian Mbappe, duke e cilësuar si “shumë dinjitoz” reagimin e lojtarit dhe të vetë klubit lidhur me polemikat e fundit që përfshijnë tregun kinez. Kapiteni i Kombëtares së Francës u ndodh në qendër të kritikave të ashpra dhe pësoi dëme të ndjeshme në planet e tij tregtare, pasi bëri disa deklarata publike për ish-liderin kinez, Mao Ce Dun. Reagimi i yllit francez, i cili e cilësoi Magon si diktator, solli menjëherë pasoja negative në shtetin aziatik, duke prekur ndjeshëm interesat e tij ekonomike në këtë rajon. Gjatë konferencës për shtyp para duelit të radhës që Real Madridi do të zhvillojë kundër Racing Santander, tekniku portugez theksoi se është i kënaqur me qasjen dhe menaxhimin e kësaj çështjeje të ndjeshme. “Këto janë rreziqet e botës së sotme, ku shpeshherë zgjidhja më e mirë mbetet heshtja. Ekzistojnë rreziqe të shumta në çdo gjë që thua apo për të cilën jep komente,” u shpreh Mourinho, duke iu referuar situatës sipas agjencisë Reuters. Dëmet financiare për sulmuesin francez kanë qenë të konsiderueshme, pasi disa kompani dhe marka të njohura nga Kina kanë vendosur t'i presin menjëherë bashkëpunimet me futbollistin. Si pasojë e kësaj situate, televizioni shtetëror kinez “Migu” ka marrë vendimin që të mos transmetojë në ekranet e tij ndeshjen e ardhshme të skuadrës madrilene në kampionat.