Spektakël i verdhekuqve në “Friuli”, Roma dominon pjesën e parë ndaj Udineses

Roma po kalon një paraqitje të jashtëzakonshme në transfertë kundër Udineses, duke kryesuar me rezultatin e thellë 0-4 në sfidën e vlefshme për javën e 10-të të kampionatit italian, Serie A. Skuadra kryeqytetase ka arritur të kalojë në epërsi që në minutën e 10-të të takimit. Ishte mesfushori Bryan Cristante ai që zhbllokoi shifrat duke mposhtur portierin vendas me një goditje të saktë me kokë, pas një krosimi perfekt të dhuruar nga Wesley Franca. Formacioni verdhekuq ka prodhuar një seri fantastike golash, duke tundur rrjetën tri herë brenda një hapësire prej vetëm gjashtë minutash. Në minutën e 31-të, pas një aksioni model të ndërtuar bukur, Matias Soule pason për Cristanten, i cili kësaj radhe shërben si asistues për Rodrigo Moran, me këtë të fundit që nuk gabon për 0-2. Vrulli i romanëve nuk u ndal me kaq, pasi në minutën e 33-të Donyell Malen shënoi golin e tretë, sërish pas një asistimi nga Matias Soule. Ndërkohë, festivali i golave në fraksionin e parë u kurorëzua në minutën e 37-të, kur pas një harkimi nga goditja e këndit po nga Soule, mbrojtësi Evan Ndicka realizoi me kokë për t'i dhënë skuadrës së tij një avantazh prej katër golash para përfundimit të pjesës së parë.