Kampionati Botëror: Zelimkhan Abakarov humbet medaljen e bronztë në sekondat e fundit

Mundësi kuqezi Zelimkhan Abakarov nuk ka arritur të sigurojë podiumin në Kampionatin Botëror të Mundjes, që po zhvillohet në Kazakistan, duke u mposhtur në përballjen përfundimtare për medaljen e bronztë në kategorinë e peshave deri në 61 kg. Përballja ka qenë tejet e fortë dhe e rivalizuar deri në sekondat e fundit. Abakarov ka qenë duke udhëhequr në epërsi me rezultatin 3-2, por rivali i tij, Kwang Myong Kim, ka arritur të barazojë shifrat në 3-3 përpara se koha të mbaronte. Për shkak të rregullit të pikës së fundit të realizuar, fitues i duelit dhe i medaljes së bronztë u shpall sportisti nga Koreja e Veriut, duke lënë sportistin kuqezi jashtë zonës së medaljeve.