Goditje ndaj trafikut të lëndëve narkotike: Policia vë n’pranga 13 persona në disa qytete të vendit

Një operacion i gjerë policor i zhvilluar gjatë dy ditëve të fundit në disa rajone të ndryshme të vendit ka rezultuar me arrestimin e 13 personave, të moshës nga 18 deri në 46 vjeç, nën dyshimet për posedim dhe shpërndarje të lëndëve narkotike. Gjatë kontrolleve të imtësishme, strukturat e rendit kanë sekuestruar sasi marihuane, pluhur të bardhë, substanca të ngurta në formë kokrrizash, si dhe lloje të ndryshme tabletash. Numri më i lartë i të ndaluarve është regjistruar në kryeqytet, ku forcat e rendit kanë prangosur nëntë persona pasi gjatë kontrollit fizik dhe të hapësirave të tyre janë zbuluar substanca narkotike. Ndërkohë, një aksion i veçantë është ndërmarrë brenda institucionit korrektues në Prilep, ku gjithashtu është ushtruar kontroll ndaj një të dënuari 32-vjeçar, të cilit iu gjetën pluhur i dyshimtë, disa pilula me ngjyra të ndryshme dhe pajisje të tjera. Në orët e mbrëmjes të po asaj dite, konkretisht rreth orës 21:00, efektivët e stacionit policor të Kamjanit kanë ndërhyrë në fshatin Bogovinë, duke hequr lirinë e një 44-vjeçari nga Piroku pasi iu gjet marihuanë. I dyshuari është shoqëruar menjëherë në ambientet e stacionit policor për veprime të mëtejshme hetimore. Ndërhyrje të ngjashme janë shënuar edhe në rajonin e Demir Kapisë, ku është arrestuar një 29-vjeçar nga fshati Koreshnicë, pasi gjatë kontrollit iu sekuestruan pluhur i bardhë dhe një tabletë. Një rast tjetër është evidentuar nga Ministria e Punëve të Brendshme edhe në qytetin e Shtipit, ku një 26-vjeçar me banim në Shkup është kapur në flagrancë duke konsumuar lëndë narkotike të llojit marihuanë. Autoritetet kompetente bëjnë me dije se pas zbardhjes dhe dokumentimit të plotë të të gjitha rasteve, ndaj personave të dyshuar do të ngrihen kallëzimet përkatëse penale pranë gjykatës.