“Rasti përsëritet për herë të dytë”/ Avokati i Erion Veliajt kërkim-përgjegjësi drejtorit të burgut të Fierit: Rrezikoni kallëzim penal

Çështja e pamundësimit të takimeve me kryebashkiakun e Tiranës, Erion Veliaj, i cili po mbahet në paraburgimin e Fierit, ka sjellë reagimin e ashpër të mbrojtësit të tij ligjor, avokatit Plarent Ndreca. Nëpërmjet një shkrese zyrtare dërguar drejtorit të institucionit, Ndreca ka bërë me dije se i është mohuar për herë të dytë hyrja brenda ambienteve të burgut për të realizuar një takim pune me klientin e tij. Ai e ka cilësuar këtë akt si një shkelje të rëndë të së drejtës për mbrojtje dhe të ushtrimit të papenguar të misionit të tij profesional. Në dokumentin e dorëzuar, avokati i është referuar nenit 51 të ligjit përkatës, duke theksuar se ky nen i njeh qartësisht avokatit të drejtën për të takuar të mbrojturin e tij në çdo moment. Ndreca ka paralajmëruar se nëse ky bllokim vazhdon, do t'i drejtohet menjëherë oficerit të policisë gjyqësore për të depozituar kallëzim penal për veprën penale të “shpërdorimit të detyrës” ndaj stafit përgjegjës. Sipas avokatit, kreu i institucionit duhet të ndërhyjë urgjentisht për të siguruar zbatimin e ligjit, duke nënvizuar se e drejta e mbrojtjes nuk mund të lihet në dorë të vullnetit apo interpretimeve subjektive të punonjësve të burgut. Ndreca ka sqaruar gjithashtu se synimi i tij nuk ka qenë kurrë përshkallëzimi apo bërja publike e këtij ngërçi, por përsëritja e pengesave e ka vënë në kushtet e detyrimit për të ndjekur rrugët ligjore. “Është hera e dytë që përsëritet e njëjta situatë. Edhe sot po pengohem të hyj në institucion dhe të takohem me klientin tim”, u shpreh ai, duke sjellë në vëmendje se neni 51 i ligjit parashikon shprehimisht të drejtën e avokatit për ta takuar klientin në çdo kohë. Më tej, ai shtoi se pengimi i ushtrimit të detyrës si mbrojtës cenon drejtpërdrejt të drejtat kushtetuese të klientit dhe gjeneron përgjegjësi penale për personat përgjegjës për shpërdorim detyre. “Nuk kam ardhur këtu për të përshkallëzuar situatën, për ta bërë publike apo për ta kthyer në çështje penale. Kam ardhur vetëm për të ushtruar detyrën time si avokat. Por përsëritja e kësaj pengese po më detyron të ndërmarr veprime ligjore”, theksoi Ndreca, duke kërkuar ndërhyrjen e menjëhershme për garantimin e ligjit. Në mbyllje, ai paralajmëroi se në të kundërt do të drejtohet tek oficeri i policisë gjyqësore në shërbim për kallëzim penal ndaj gjithë punonjësve përgjegjës, duke kujtuar se respektimi i ligjit nuk është çështje vullneti apo diskrecioni, por një detyrim i prerë.