Vëmendja e medieve italiane te tensionet në Tiranë: Studentët kërkojnë largimin e Ramës, përleshje me policinë

Kryeqyteti shqiptar është përfshirë sërish nga vala e protestave antigeveritare, ku qindra studentë janë tubuar në shenjë pakënaqësie para Ministrisë së Arsimit, duke kërkuar hapur dorëheqjen e kryeministrit Edi Rama. Tubimi ka degjeneruar shpejt në tensione dhe përleshje të ashpra fizike me strukturat e rendit. Disa nga demonstruesit i kanë vënë flakën kazanëve të mbeturinave në shenjë revolte, ndërkohë që në drejtim të forcave policore janë hedhur gurë dhe mjete piroteknike si bomba molotov. Si kundërpërgjigje ndaj dhunës, forcat e sigurisë kanë përdorur autobotët me ujë dhe gaz lotsjellës, raporton e përditshmja italiane „IlFattoQuotidiano“ në pasqyrimin e saj për situatën në Tiranë. Episodet e dhunës dhe përplasjet fizike kanë vazhduar për rreth gjysmë ore, pas së cilës një pjesë e protestuesve janë tërhequr nga zona. Megjithatë, pavarësisht kushteve atmosferice të paf kedhshme dhe reshjeve të shiut, marshimi protestues ka vijuar lëvizjen drejt ndërtesës së Kryeministrisë. Në ambientet pranë Ministrisë së Arsimit është vërejtur një prani e shtuar dhe dislokim masiv i forcave të rendit për të mbajtur situatën nën kontroll. Sipas të dhënave nga terreni, protestat kundër ekzekutivit në Shqipëri kanë nisur prej muajsh, ndërsa intensiteti i tyre është rritur ndjeshëm që prej muajit tetor. Në përgjigje të këtyre ngjarjeve, qeveria ka vendosur masa më të rrepta ndëshkimore kundër akteve të dhunës gjatë tubimeve, ku gjobat për personat përgjegjës mund të kapin shifrën deri në 5,500 euro. Gjatë zhvillimit të protestave të fundit janë shënuar gjithashtu dëme materiale, përfshirë djegien dhe shkatërrimin e disa ndërtesave publike, gjykatave, institucioneve shtetërore, si dhe dëmtimin e pronave të bizneseve private. Kërkesa kryesore e studentëve mbetet largimi nga pushteti i kryeministrit Edi Rama, ndërkohë që administrata socialiste drejton vendin që prej vitit 2013.