Thellohet partneriteti mes Turqisë dhe Maqedonisë së Veriut në sektorin e mjekësisë

Ankaraja dhe Shkupi kanë zyrtarizuar partneritetin e tyre në fushën e shëndetësisë dhe shkencave mjekësore, përmes nënshkrimit të një memorandumi mirëkuptimi që synon ngritjen në një nivel më të lartë të kujdesit shëndetësor. Lajmi është bërë i ditur të shtunën nga ministri i Shëndetësisë i Turqisë, Kemal Memisoglu. Përmes një postimi në rrjetin social turk NSosyal, ministri Memisoglu theksoi se shteti turk mbetet i përkushtuar në zgjerimin e partneriteteve ndërkombëtare në fushën e shëndetësisë. Kreu i shëndetësisë turke bëri të ditur se marrëveshja u finalizua gjatë takimit të tij me homologun nga Maqedonia e Veriut, Sasho Klekovski, i cili u zhvillua në kuadër të Kongresit të 12-të Botëror Turkik të Mjekësisë. Duke renditur pikat kryesore të paktit, Memisoglu u shpreh se synimi parësor është intensifikimi i punës së përbashkët në disa drejtime kyçe, duke përfshirë shëndetin publik, industrinë farmaceutike, pajisjet mjekësore, investimet shëndetësore, si dhe digjitalizimin e shërbimeve mjekësore. Në fund të deklaratës së tij, ministri turk shprehu optimizmin se ky hap do të intensifikojë lidhjet dypalëshe në sektorin mjekësor. “Besoj sinqerisht se bashkëpunimi ynë në fushën e shëndetësisë do të forcohet edhe më shumë në periudhën e ardhshme dhe shpresoj që marrëveshja që kemi nënshkruar të sjellë rezultate pozitive për vendet tona”, u shpreh ndër të tjera ai.