Formë e jashtëzakonshme: Flurina Rigling rrëmben dy medalje të arta brenda 48 orëve në Kampionatin Botëror

Sportistja zvicerane Flurina Rigling ka vazhduar shfaqjen e saj mbresëlënëse në Kampionatin Botëror të paraciklizmit në pistë, ngjarje sportive kjo që po mbahet në qytetin holandez, Apeldoorn. Ngjarja ka shënuar një tjetër triumf për 30-vjeçaren nga Cyrihu, e cila gjatë ditës së premte, më 30 tetor, ka rrëmbyer medaljen e saj të dytë të artë brenda dy ditëve rresht, duke dominuar plotësisht në disiplinën scratch për kategorinë C2. Për të siguruar këtë vend të parë, Rigling ka lënë prapa konkurrentet e saj, britaniken Amelia Cass dhe amerikanen Allison Jones, duke dëshmuar edhe një herë dominimin e saj absolut në këtë kategori. Forma e shkëlqyer e zviceranes është kurorëzuar me dy tituj dhe një rekord të ri botëror brenda një kohe kaq të shkurtër. Vlen të kujtohet se vetëm një ditë më herët, ajo u stolis me medaljen e artë në garën e kronometrit prej një kilometri. Gjatë fazës kualifikuese të kësaj gare, ajo theu rekordin botëror duke ndalur kronometrin në 1 minutë, 16 sekonda e 750 të mijtat. Ndërkohë, në finale ajo triumfoi me kohën 1:17.220, duke lënë pas rivalet e saj me një diferencë prej më shumë se tri sekondash. Falë këtij ekuilibri të përsosur dhe dy medaljeve të arta, Rigling është shndërruar në një nga yjet kryesore të këtij eventi botëror. Përveç suksesit të saj, delegacioni zviceran në Apeldoorn ka shënuar edhe arritje të tjera të rëndësishme. Talenti 21-vjeçar nga kantoni Aargau, Quirin Lutz, ka ngjitur podiumin duke fituar medaljen e bronztë në disiplinën e sprintit për kategorinë C2. Lutz u rendit pas çiklistit vendës, holandezit Hidde Buur, dhe atij australian, Gordon Allan, duke arritur kështu të sigurojë medaljen e tij të parë në karrierë në një Kampionat Botëror në pistë. Ky rezultat merr peshë të madhe për karrierën e sportistit të ri, i cili po debuton në një kompeticion të përmasave të tilla globale. Pavarësisht suksesit të arritur deri tani, rrugëtimi i Rigling nuk mbyket me kaq, pasi Kampionati Botëror në Apeldoorn do të vazhdojë deri më 1 nëntor. Ajo pritet të zbresë sërish në pistë në dy disiplina të tjera, ku starton si kampionia në fuqi dhe pretendente kryesore. Për sportin zviceran, paraqitjet fantastike të 30-vjeçares nga Cyrihu dhe ky podium i parë i Lutzit konfirmojnë nivelin e lartë të zhvillimit të paraciklizmit në vend. Dy titujt e fituar brenda dy ditëve dhe rekordi i ri botëror mbeten dëshmia më e mirë e përkushtimit dhe klasit sportiv të Flurina Rigling.