Zbardhet krimi i rëndë në Athinë: Pranga 48-vjeçarit shqiptar për vrasjen e korrikut

Autoritetet policore greke kanë finalizuar hetimet për një ngjarje të rëndë kriminale të regjistruar më 24 korrik të këtij viti në zonën e Galacit në Athinë, duke vënë në pranga autorin e dyshuar. Si personi kryesor përgjegjës për këtë vrasje është identifikuar shtetari shqiptar Ilian Kola, 48 vjeç. Sipas informacioneve nga grupi hetimor, i dyshuari kishte lidhje të mëparshme me viktimën dhe shkonte shpesh në shtëpinë e tij. Gjatë këtyre takimeve, ai kujdesej për kryerjen e punëve dhe shërbimeve të ndryshme, kundrejt pagesave modeste që merrte nga i ndjeri. Në qendër të hetimeve të deritanishme qëndron pista e grabitjes me pasojë vrasjen. Organet e rendit dyshojnë fort se shkas për këtë akt kriminal është bërë synimi për të grabitur të holla dhe orendi me vlerë nga banesa e viktimës. Kjo hipotezë është përforcuar edhe nga verifikimet e kryera në vendngjarje, ku pas krimit është konfirmuar mungesa e një shume parash dhe sendeve të çmuar. Hapat e ndërmarrë nga policia greke mundësuan zbardhjen e plotë të rrethanave dhe kapjen e 48-vjeçarit si autorin e dyshuar të ngjarjes.