Bilanci i rëndë i protestave në Tiranë: 201 policë të lënduar, identifikohen 52 autorë të dyshuar të dhunës

Gjatë dy javëve të fundit të protestave të zhvilluara në kryeqytet, 201 efektivë të Policisë së Shtetit kanë pësuar lëndime në detyrë. Ky bilanc shqetësuar u bë i ditur nga Drejtori i Përgjithshëm i Policisë së Shtetit, Skënder Hita, përmes një deklarate zyrtare për mediat. Kreu i policisë theksoi se tubimet janë shoqëruar me akte të papranueshme dhune, të drejtuar jo vetëm ndaj uniformave blu, por edhe ndaj godinave shtetërore, pasurive publike e private, duke rrezikuar drejtpërdrejt edhe sigurinë e qytetarëve të thjeshtë. Në kuadër të hetimeve, përmes analizimit të hollësishëm të materialeve filmike, autoritetet kanë arritur të identifikojnë deri më tani 52 persona që dyshohet se kanë marrë pjesë aktive në akte të dhunshme. Dosjet e tyre tashmë i kanë kaluar Prokurorisë së Tiranës për veprime të mëtejshme penale. Sipas Hitës, puna investigative nuk do të ndalet me kaq. Blutë e kryeqytetit po vijojnë verifikimet për të zbuluar çdo individ tjetër të përfshirë dhe për të dokumentuar ligjërisht të gjitha episodet e dhunës, veçanërisht ato që përbënin rrezik jetik për efektivët dhe qytetarët. Në fjalën e tij, drejtuesi i policisë lëshoi një apel të drejtpërdrejtë për kujdes ndaj prindërve, duke u kërkuar atyre që të mos lejojnë të miturit të bëhen pjesë e skenave të dhunshme. Ai gjithashtu ftoi qytetarët që të distancohen nga çdo akt paligjshmërie dhe të bashkëpunojnë ngushtë me strukturat e rendit për të garantuar sigurinë publike. Një vëmendje e veçantë iu kushtua edhe raportit me median. Hita rikonfirmoi mbështetjen për gazetarët, operatorët dhe fotoreporterët, duke theksuar se atyre duhet t'u sigurohet liri e plotë dhe pavarësi në ushtrimin e detyrës. Ai vuri në dukje domosdoshmërinë e një koordinimi më të mirë në terren për të mbrojtur gazetarët pa cenuar rrjedhën e punës së tyre. Në mbyllje të prononcimit, Drejtori i Përgjithshëm i Policisë së Shtetit ritheksoi se institucioni që ai drejton do të mbrojë me çdo kusht të drejtën e qytetarëve për të protestuar në mënyrë paqësore, por do të veprojë me forcën e ligjit kundër çdo individi që zgjedh dhunën ose shkatërrimin e pronës.