Lamtumirë diplomatit të shquar: Shuhet në moshën 78-vjeçare Bashkim Zeneli

Komuniteti akademik, politik dhe diplomatik i Shqipërisë është tronditur nga lajmi për ndarjen nga jeta të diplomatit, ish-deputetit dhe publicistit të njohur, Bashkim Zeneli, i cili ka mbyllur sytë përgjithmonë në moshën 78-vjeçare. Mësohet se ai ka ndërruar jetë duke u trajtuar në një spital jashtë kufijve të vendit. Gjatë jetës së tij aktive, Zeneli ka lënë gjurmë të pashlyeshme në disa fusha, duke shërbyer fillimisht si gazetar, më pas si ligjvënës në Kuvendin e Shqipërisë dhe duke përfaqësuar vendin tonë si ambasador në dy shtete kyçe, në Gjermani dhe Greci. Si një ndër figurat e hershme intelektuale të Partisë Socialiste, ai dha një ndihmesë të çmuar në ndërtimin e jetës institucionale dhe politike të Shqipërisë pluraliste. Karriera e tij e gjatë diplomatike u karakterizua nga përpjekje të palodhura për ngritjen e urave të bashkëpunimit me shtetet fqinje dhe partnerët strategjikë ndërkombëtarë. Përveç kësaj, përmes botimeve, kujtimeve dhe artikujve të tij publicistikë, Zeneli pasuroi arkivën historike të diplomacisë shqiptare me dëshmi dhe analiza me vlera të larta dokumentare. Kontributi i tij polivalent u kurorëzua në vitin 2018, kur ish-presidenti Ilir Meta i mveshi titullin e lartë “Mjeshtër i Madh”. Ky vlerësim iu dha në shenjë mirënjohjeje për rolin e tij të spikatur në politikën e jashtme, angazhimin si gazetar e publicist, përfaqësimin mé dinjitet si ambasador, si dhe për përkushtimin e palëkundur ndaj çështjes kombëtare dhe rrugëtimit euroatlantik të vendit. "Angazhimi i tij si ambasador në Gjermani gjatë krizës së Kosovës do të mbetet i veçantë dhe i jashtëzakonshëm në shërbim të kësaj çështje madhore", do të shprehej në atë kohë Meta, duke evokuar dhe vlerësuar lart angazhimin e Zenelit në momente vendimtare për kombin.