Hetimet për projektin 12 milionësh: Përparim Rama përballet sot me Prokurorinë Speciale

Kryetari i Komunës së Prishtinës, Përparim Rama, do të paraqitet gjatë ditës së sotme para hetuesve të Prokurorisë Speciale të Republikës së Kosovës për t'u marrë në pyetje rreth nismës së njohur si “Arkitekti i Kryeqytetit”. Sipas informacioneve të siguruara, kreu i komunës pritet të paraqitet në dyert e prokurorisë rreth orës 13:00, ku do të ballafaqohet me pyetjet e organit të akuzës në cilësinë e personit të dyshuar. Fokusi i hetimeve lidhur me këtë projekt dyshohet se ka të bëjë me shkeljet e mundshme në procedurat e prokurimit publik, vlerën e lartë financiare që arrin shifrën e 12 milionë eurove, si dhe me pretendimet për konflikt interesi dhe manipulime me stafin. Kjo kontratë, e cila u vu në jetë nën drejtimin e kryetarit Rama, ka qenë vazhdimisht në qendër të kritikave të ashpra nga partitë opozitare dhe nga shoqëria civile në kryeqytet. Zhvillimet e sotme vijnë vetëm pak kohë pasi përfaqësues të Lëvizjes Vetëvendosje kishin paralajmëruar publikisht mundësinë e një arrestimi të shefit të ekzekutivit vendor. Sinjalin e parë në këtë drejtim e kishte dhënë deputeti i kësaj partie, Egzon Azemi, i cili përmes një postimi në rrjetin social Facebook kishte shkruar: “Përparim Rama… tik tak, tik tak…”. Këto paralajmërime u bënë menjëherë pas zhvillimeve të fundit dhe ndryshimeve në strukturën udhëheqëse të Prokurorisë Speciale. Më 2 tetor, Këshilli Prokurorial i Kosovës (KPK) ndërmori një hap drastik duke shkarkuar Blerim Isufajn nga pozita e tij me gjashtë vota pro dhe një kundër. Të drejtimin e përkohshëm të këtij institucioni ky Këshill ia besoi prokurorit Dren Paca. Mbledhja në fjalë ishte thirrur si e jashtëzakonshme dhe u mbajt me dyer të mbyllura, duke shkaktuar debate të shumta rreth mungesës së transparencës. Si arsyetim për këtë vendim, KPK-ja përmendi keqmenaxhimin, mungesën e kompetencës, mosrealizimin e detyrave funksionale dhe performancën e dobët. Në atë kohë, Përparim Rama kishte reaguar ashpër ndaj paralajmërimeve të zyrtarëve të pushtetit, duke u bërë thirrje institucioneve të drejtësisë që të hetojnë ato që ai i quajti presione dhe kërcënime të hapura nga deputetët dhe asamblistët e Lëvizjes Vetëvendosje. “Kërcënimet ndaj meje nuk janë asgjë e re. Ato vetëm sa janë intensifikuar kohëve të fundit nga deputetë dhe asambleistë të Lëvizjes Vetëvendosje, të cilët marrin guximin të kërcënojnë në emër të shtetit dhe institucioneve të tij”, kishte deklaruar Rama në reagimin e tij. Kryetari i Prishtinës kishte ngritur gjithashtu shqetësimin se kjo parti politike po i shfrytëzon institucionet shtetërore si mjete presioni ndaj kundërshtarëve të saj politikë apo edhe ndaj mediave. “Ku ndodhet drejtësia në këtë vend? Në institucionet e pavarura të Republikës apo në zyrat e Lëvizjes Vetëvendosje?”, kishte pyetur hapur Rama në reagimin e tij publik.