Mbi 300 vende pune për mjekët: Hapet konkursi i ri për specializime me risi digjitale

Ministri i Shëndetësisë, Arben Vitia, ka zyrtarizuar hapjen e konkursit për shkollim specialistik, duke vënë në dispozicion të mjekëve gjithsej 313 pozita të reja. Kjo thirrje publike shënon konkursin e katërt të kësaj natyre brenda një periudhe më të shkurtër se katër vjet, ku theksi kryesor është vendosur te profilet deficitare dhe kërkesat specifike të spitaleve dhe qendrave rajonale shëndetësore. Për herë të parë, si risi e këtij edicioni, Ministria e Shëndetësisë ka marrë përsipër financimin e 20 vendeve shtesë për specializim në degën e mjekësisë familjare. Një tjetër ndryshim i rëndësishëm ka të bëjë me digjitalizimin e plotë të vlerësimit. Mjekët aplikues do të dorëzojnë të dhënat e tyre online, ndërsa platforma digjitale do të bëjë përllogaritjen e pikëve konform kritereve zyrtare. Pas shqyrtimit dhe verifikimit nga bordi përkatës, çdo kandidat do të ketë qasje të plotë për të kontrolluar pikët e tij në mënyrë transparente. Gjatë këtij njoftimi, ministri Vitia ka bërë të ditur se në një të ardhme të afërt pritet të publikohet edhe një tjetër konkurs për shkollim specialistik, i cili do të adresojë nevojat e institucioneve shëndetësore publike. “Më shumë mundësi për mjekët tanë, më shumë transparencë në proces”, ka theksuar Vitia, duke përcjellë urimet e tij për sukses të gjithë mjekëve që do të bëhen pjesë e garës.