Vazhdojnë tensionet: Elijona rikthen thumbimet për Benitën, reagon menjëherë ish-banorja

Duket se rivaliteti dhe përplasjet e kaluara mes Elijona Binakajt dhe Benita Zenës i kanë kaluar kufijtë e edicionit të mëparshëm, duke u rikthyer sërish në vëmendje të publikut. Elijona, e cila u rikthye mbrëmë si mysafire në shtëpinë e Big Brother VIP Kosova 5 përkrah tre banorëve të parë, ka zgjedhur të mos i kursejë ngacmimet dhe ironitë gjatë bisedës me ta. Gjatë këtij momenti, ish-finalistja bëri një deklaratë duke u shprehur se ka persona që kanë fituar famë vetëm falë dhëmbëve të tyre, një aluzion ky që u kuptua qartë si një thumbim i drejtpërdrejtë ndaj ish-banores së edicionit të katërt, Benita Zenës. Reagimi i Benitës nuk ka vonuar të shfaqet në rrjetet sociale. Ajo ka përdorur llogarinë e saj zyrtare në Instagram, ku përmes një InstaStory ka publikuar mbishkrimin “Sa ka ta ta dhez”, duke treguar hapur se nuk i ka lënë pa u vënë re fjalët e Elijonës. Vlen të theksohet se të dyja vajzat kanë pasur mosmarrëveshje të herëpashershme që gjatë garës së tyre në BBVK 4, ku pamja dhe dhëmbët e Benitës kanë qenë herë pas here në qendër të debateve mes tyre. Në një nga përballjet e mëparshme, Elijona e kishte ironizuar publikisht edhe për dhëmbin e saj të diamantit. Me nisjen e një tjetër sezoni të ri të formatit më të ndjekur televiziv, duket qartë se kapitulli i konflikteve mes tyre mbetet ende i hapur.