Pas rikthimit në Venezuelë, liderja e opozitës María Corina Machado kërkon votime të reja

María Corina Machado, figura kryesore e opozitës në Venezuelë, ka kërkuar zyrtarisht organizimin e zgjedhjeve, pas rikthimit të saj në vend. Gjatë një konference për shtyp të mbajtur në Karakas ditën e enjte, fituesja e Çmimit Nobel për Paqen deklaroi se rruga e shtetit drejt demokracisë është shndërruar në një proces “të pakthyeshëm”. Ajo shprehu gjithashtu mirënjohjen ndaj administratës Trump për hapjen e “portës së lirisë”, duke iu referuar arrestimit të ish-presidentit Nicolás Maduro, kundërshtarit të saj politik. Po atë ditë, presidentja e përkohshme e Venezuelës, Delcy Rodríguez, konfirmoi se zgjedhjet do të zhvillohen, duke theksuar se administrata e saj duhet të mbikëqyrë një “tranzicion të kësaj madhësie”, një qëndrim që Machado e cilësoi si të palogjikshëm. Rodríguez, e cila më parë ka mbajtur postin e nënkryetares nën drejtimin e Maduros, nuk ka caktuar ende një datë të saktë për votimet, ndërsa Machado përmendi vitin 2027, megjithëse pa ofruar një afat kohor përfundimtar. Duke folur para një panoje me sloganin “Le të jemi të lirë”, Machado garantoi se tranzicioni në Venezuelë do të jetë “i pakthyeshëm, i organizuar dhe paqësor”. Kthimi i saj në atdhe pason disa përpjekje të mëparshme të pasuksesshme për të hyrë në vend. Vitin e kaluar, ajo u largua nga Venezuela fshehurazi me motoskaf nën errësirë për të udhëtuar drejt Norvegjisë, ku pranoi Çmimin Nobel për Paqen. Menjëherë pas kësaj ngjarjeje, në muajin janar, autoritetet e Shteteve të Bashkuara arrestuan Maduron. Më pas, administrata Trump mbështeti Delcy Rodríguez si udhëheqëse të vendit. Ajo bëri betimin si presidente e përkohshme dhe më vonë firmosi një marrëveshje për naftën që i siguroi kushte të favorshme SHBA-ve. Ndonëse hapat e ardhshëm të Machados mbeten për t'u parë, ajo më herët ka deklaruar synimin për të kandiduar sërish për presidente në rast se mbahen zgjedhjet, ndërkohë që mundësia e kthimit të saj vatej nga miratimi i administratës Trump. Lidhur me rikthimin e saj, Machado tregoi se ka dëgjuar fjalën “liri” të përsëritur nga mijëra mbështetës që kishin mbushur rrugët gjatë udhëtimit të saj drejt kryeqytetit. “Unë vij për të kryer një detyrë dhe për të përmbushur një mandat,” u shpreh ajo, duke shtuar se nuk ka marrë asnjë mesazh apo ftesë për takim nga Rodríguez dhe se nuk do të përfshihet personalisht në bisedimet zgjedhore midis opozitës dhe qeverisë. Megjithatë, ajo u uroi palëve punë të mbarë, me qëllim reformimin e institucionit zgjedhor në mënyrë që çdo qytetar venezuelian, brenda dhe jashtë vendit, të ketë mundësinë të votojë. Pak para daljes publike të Machados, Rodríguez mbajti një fjalim me ton pajtues, duke bërë të ditur se kishte “udhëzuar agjencitë e sigurisë që askush të mos ndalohet pa urdhër gjyqësor, përveç në rastet e kryerjes flagrante të krimeve”.