Operacion i suksesshëm: Ekstradohet nga Zvicra drejt Kosovës personi i kërkuar ndërkombëtarisht

Prishtinë, më 27 Tetor 2026 Policia e Kosovës, përmes Drejtorisë për Bashkëpunim Ndërkombëtar Policor dhe në bashkëngjitje me strukturat e tjera relevante të sigurisë dhe organet e drejtësisë, ka përmbyllur me sukses një operacion ekstradimi nga Zvicra drejt vendit tonë. Më 27.10.2026, shtetasi kosovar me inicialet A.Z. është sjellë në Kosovë nga Zvicra, pasi ishte shpallur në kërkim ndërkombëtar me urdhërarrest të lëshuar nga autoritetet tona të drejtësisë, për shkak të përfshirjes së tij në veprën penale: Rrezikimi i Trafikut Publik. Pas mbërritjes dhe përfundimit të procedurave të ekstradimit, i dyshuari është transferuar te njësitet kompetente të Drejtorisë Rajonale të Policisë në Gjilan, për të vijuar me hapat e mëtutjeshëm ligjorë. Drejtoria për Bashkëpunim Ndërkombëtar Policor mbetet e përkushtuar në intensifikimin e shkëmbimit të të dhënave me autoritetet vendase, shtetet partnerë dhe organizatat ndërkombëtare. Qëllimi mbetet parandalimi, hetimi dhe zbulimi i veprave penale, si dhe gjurmimi, kapja dhe vënia para drejtësisë e personave dhe grupeve kriminale që operojnë brenda dhe jashtë kufijve të vendit.