“Era e duhanit po arrin deri në zyrën time” – Albulena Haxhiu lëshon ultimatum për deputetët që tymosin në Kuvend

Kryetarja e Kuvendit të Kosovës, Albulena Haxhiu, ka ngritur alarmin gjatë seancës plenare lidhur me mosrespektimin e ligjit për ndalimin e duhanit në hapësirat e mbyllura, duke u bërë thirrje ligjvënësve që t'i japin fund këtij fenomeni. Ajo paralajmëroi se nëse ky rregull vazhdon të shkelet, do të kërkojë urgjentisht angazhimin e Inspektoratit për shqiptimin e gjobave. Sipas Haxhiut, dukuria e konsumimit të duhanit brenda ndërtesës së Kuvendit është bërë shqetësuese, duke u ndjerë madje edhe në zyrën e saj zyrtare. “Unë nuk po mundem me funksionu as vetë këtu si kryetare e kuvendit, sepse deri këtu po mbërrin era e duhanit”, u shpreh ajo para të pranishmve. Ajo u kujtoi deputetëve se janë pikërisht ata institucioni që ka miratuar këtë ligj, prandaj detyrimi për ta zbatuar atë është moral dhe institucional. “Kërkoj nga deputetët e Kuvendit të Republikës së Kosovës që ta respektojnë ligjin që e ka miratuar ky kuvend, që në ambientet e mbyllura të kuvendit të mos pihet duhani”, deklaroi ajo. Duke qenë se thirrjet verbale duket se nuk kanë mjaftuar, Haxhiu ka kaluar në paralajmërime konkrete ndëshkimore. Ajo theksoi se çdo shkelje e mëtejshme do të sjellë ndërhyrjen e autoriteteve kompetente inspektuese. “Përndryshe, do të detyrohemi menjëherë që me kërku nga inspektorati që të vijë në ambientet e kuvendit dhe të marrin gjoba deputetët, të cilët e shkelin ligjin në ambientet e Kuvendit të Republikës së Kosovës”, u shpreh Haxhiu, duke e cilësuar këtë si mesazhin e fundit paralajmërues. Kryetarja e Kuvendit vuri në dukje se institucioni më i lartë ligjvënës duhet të shërbejë si shembulli kryesor në shoqëri për zbatimin e ligjshmërisë. “Është thirrja e fundit; prandaj, ju lutem që të keni parasysh këtë, sepse kjo realisht edhe cenon ndoshta zbatimin e barabartë të ligjit, sepse nëse ne kërkojmë nga dikush tjetër me zbatu ligjin, do të duhej që ne të ishim vetë shembulli i parë se si zbatohet ligji që miratohet nga ky Kuvend”, tha ajo. Në mbyllje të fjalës së saj, Haxhiu ishte e prerë se nuk do të ketë më tolerim për këtë çështje, duke ritheksuar hapat që do të ndërmerren në rast të mosrespektimit të vërejtjes së saj. “Është thirrja e fundit, dhe në qoftë se edhe kjo thirrje nuk respektohet, do të kërkoj nga inspektorati që të vijë dhe të ndërmarrë veprime të përputhshme me përgjegjësitë”, përfundoi ajo.