Incident me armë zjarri në Gjakovë: Autori dorëzohet në polici, detajet zyrtare

Një ngjarje me armë zjarri është regjistruar mbrëmjen e sotme, rreth orës 18:00, në rrugën “Bujar Syla” në qytetin e Gjakovës, ku banorët kanë dëgjuar të shtëna. Ngjarja është konfirmuar zyrtarisht nga Vlera Krasniqi, zëdhënëse e Drejtorisë Rajonale të Policisë në Gjakovë, e cila ka dhënë detajet e para mbi zhvillimet rreth këtij rasti. Sipas njoftimit zyrtar, situata ka marrë një kthesë kur vetë personi i dyshuar është paraqitur vullnetarisht në Stacionin Policor të Gjakovës për t'u dorëzuar. “Në koordinim me Prokurorin e Shtetit, ndaj tij janë iniciuar rastet për veprat penale “Mbajtja në pronësi, kontroll ose posedim i paautorizuar i armëve” dhe “Përdorimi i armës apo mjetit të rrezikshëm”, ka deklaruar Krasniqi. Në bazë të urdhërit të dhënë nga prokurori kompetent, ndaj të dyshuarit është caktuar masa e ndalimit prej 24 orësh, ndërkohë që hetimet vijojnë për zbardhjen e plotë të rrethanave të ngjarjes.