Tragjedia në Pejë, Daut Haradinaj: Mbiemri im nuk është mburojë për askënd, institucionet të japin llogari

Zyrtari i lartë i Aleancës për Ardhmërinë e Kosovës (AAK), Daut Haradinaj, ka reaguar ashpër lidhur me vrasjen e tronditëse të Arlinda Zekajt në qytetin e Pejës, duke kërkuar masa urgjente, shkarkime nga detyra dhe ndëshkim meritor për të gjithë personat përgjegjës. Nëpërmjet një deklarate publike, Haradinaj ka theksuar se kjo ngjarje e rëndë nuk kërkon deklarata me karakter moral politik, por kërkon llogaridhënie të drejtpërdrejtë dhe veprime konkrete nga ana e organeve shtetërore. Duke iu referuar aludimeve rreth lidhjeve të mundshme të të dyshuarit me individë me ndikim, ai ka qenë i prerë se askush nuk mund të gëzojë statusin e të paprekshmit duke u fshehur pas mbiemrit Haradinaj. “Askush nuk mund ta përdorë mbiemrin Haradinaj për të krijuar përshtypjen se dikush është i paprekshëm”, ka shkruar ai ndër të tjera në reagimin e tij. Gjithashtu, Haradinaj ka ngritur pikëpyetje serioze mbi mungesën e reagimit institucional ndaj shqetësimeve që, sipas bindjes së tij, duhej të merreshin seriozisht shumë kohë para se kjo tragjedi të ndodhte. Ai ka përmendur edhe avokaten e cila kishte mbrojtur interesat e viktimës Arlinda Zekaj, duke kërkuar sqarime publike për pretendimet e ngritura dhe një reagim zyrtar nga Oda e Avokatëve të Kosovës. Në lidhje me përfshirjen e emrit të familjes së tij në këtë kontekst, Haradinaj ka lëshuar një paralajmërim për ndërmarrjen e hapave ligjorë ndaj çdo individi që, sipas tij, e përdor mbiemrin Haradinaj pa fakte ose tenton ta keqpërdorë atë për të frikësuar të tjerët. Në mbyllje të reagimit të tij, ai ka vënë në dukje dështimin e institucioneve të vendit për të garantuar mbrojtjen e grave nga dhuna, duke e cilësuar këtë si një dështim alarmant të të gjithë sistemit të drejtësisë dhe sigurisë publike. “Lufta me armë për ne përfundoi në vitin 1999. Që nga ajo ditë, e vetmja luftë që kemi është ajo për sigurinë e çdo qytetari të Kosovës, për sovranitetin e saj dhe për të ardhmen e saj”, ka përfunduar Haradinaj.