Tragjedia në Pejë, Kurti: Arlinda kërkoi ndihmë institucionale, por u la pa mbrojtjen që i shpëtonte jetën

Kryeministri i vendit, Albin Kurti, ka ngritur alarmin dhe ka kërkuar një hetim të thellë e urgjent lidhur me vrasjen e rëndë të Arlinda Zekajt në fshatin Vitomiricë të Pejës. Gjatë fjalës së tij në Kuvendin e Kosovës, ai bëri të publike se viktima i ishte drejtuar organeve kompetente vetëm tri ditë para se të ekzekutohej, duke paralajmëruar publikisht për rrezikun e madh që i kanosej jetës së saj. Duke e cilësuar ngjarjen si një akt mizor dhe tejet tronditës për mbarë shoqërinë, kreu i ekzekutivit theksoi se institucionet dështuan t'i sigurojnë asaj mbështetjen jetike. "Një bashkëqytetare e jona kërkoi, por nuk e mori mbrojtjen që i duhej për të mbetur gjallë. Arlinda Zekaj u vra dje. Vrasja mizore e Arlinda Zekajt është tronditëse për të gjithë ne", u shpreh kryeministri Kurti para ligjvënësve. Sipas shefit të Qeverisë, fakti që vetëm tri ditë para tragjedisë e ndjera ishte paraqitur në Prokurori për të denoncuar rrezikun real për jetën e saj, e bën situatën edhe më alarmante. Përballë këtyre rrethanave, ai kërkoi zbardhjen e menjëhershme të ngjarjes, në kohën kur personi i dyshuar si autor i krimit ndodhet ende në arrati. Kurti ka vënë theksin te llogaridhënia institucionale, duke kërkuar nga prokuroria dhe organet e rendit që të sqarojnë me detaje trajtimin që i është bërë denoncimit të viktimës dhe arsyet pse thirrja e saj për ndihmë nuk u përkthye në masa konkrete mbrojtëse. "Çdo shkelje duhet të zbardhet", përfundoi deklaratën e tij kryeministri Kurti nga foltorja e Parlamentit.