Në kuadër të Javës së Gjuhës Italiane, Italia pasuron fondin e Bibliotekës Kombëtare të Kosovës me një donacion librash

Ambasada e Italisë në Prishtinë ka përuruar një hapësirë të re kushtuar librave në gjuhën italiane në Bibliotekën Kombëtare të Kosovës “Pjetër Bogdani”, falë një donacioni të siguruar nga bibliotekat qytetare të Torinos. Gjatë ceremonisë, ambasadori i Italisë në Kosovë, Maurizio Antonini, theksoi se ky hap paraqet një gur kilometrik për forcimin e urave kulturore mes dy vendeve. “Jemi jashtëzakonisht mirënjohës për këtë donacion librash për Bibliotekën Kombëtare të Prishtinës, i cili përbën një kontribut jashtëzakonisht të vlefshëm për shkëmbimin kulturor ndërmjet Italisë dhe Kosovës. Java e Gjuhës Italiane në Botë është një mundësi e rëndësishme për të kremtuar gjuhën tonë dhe trashëgiminë e saj kulturore, duke promovuar njëkohësisht dialogun dhe shkëmbimin ndërmjet kulturave të ndryshme”, u shpreh diplomati italian, Antonini. Në anën tjetër, drejtoresha e Bibliotekës Kombëtare të Kosovës, Blerina Rogova-Gaxha, u shpreh se këto tituj të rinj nga qyteti i Torinos do t'u ofrojnë një qasje më të gjerë studentëve, studiuesve dhe të gjithë pasionantëve për të eksploruar letërsinë dhe traditën italiane. “Dua të shpreh mirënjohjen time për Ambasadën e Italisë në Kosovë për bashkëpunimin, si dhe Bibliotekat e Torinos për donacionin e çmuar të librave, i cili mundëson krijimin e këndit italian në hapësirën që ne e kemi konceptuar si sallë të letërsisë së huaj. Ky kontribut pasuron fondin tonë bibliotekar, por mbi të gjitha krijon edhe mundësi të reja për lexuesit, studiuesit, studentët dhe për ata që duan ta njohin më afër gjuhën, kulturën dhe letërsinë italiane”, deklaroi Rogova-Gaxha.