Kriza defensive thellohet te Barcelona: Xavi Espart mbetet jashtë fushave për afro dy muaj

Trajneri i Barcelonës, Hansi Flick, po përballet me shqetësime serioze, pasi brenda një periudhe më të shkurtër se një muaj, skema e tij e mbrojtjes ka pësuar goditje të njëpasnjëshme si pasojë e një vale dëmtimesh. Situata nisi me mungesën e Andreas Christensen, për t'u pasuar nga shqetësimet fizike të Eric Garcias dhe Jules Koundes, ndërsa së fundmi është zyrtarizuar edhe mungesa e afatgjatë e Xavi Espartit. Kontrollet mjekësore të kryera gjatë ditës së hënë kanë konfirmuar se bëhet fjalë për një dëmtim mjaft të rëndë në sindesmozën e kyçit të këmbës së djathtë, lëndim ky që do ta detyrojë lojtarin të qëndrojë larg fushave të blerta për rreth shtatë javë. Kjo do të thotë se Espart do t'i mungojë skuadrës katalanase deri në vitin 2027, duke i shkaktuar një tjetër ngarkesë të rëndë stafit teknik të Barcelonës. Talenti i prapavijës u dëmtua pas një dyluftimi të ashpër me Aurelien Tchouamenin, i cili në tentativë e sipër për të kontrolluar sferën ka goditur fort kyçin e këmbës së djathtë të futbollistit të Barçës. Edhe pse mbrojtësi provoi të shtrëngonte dhëmbët për të vazhduar takimin, pas pak minutash ai u detyrua të ulej në tokë dhe të kërkonte ndërhyrjen e stafit mjekësor për t'u zëvendësuar. Pas kësaj mungese të re, opsionet e Flick në repartin e prapavijës janë ngushtuar ndjeshëm, duke i lënë në dispozicion vetëm katër mbrojtës të gatshëm: Pau Cubarsin, Gerard Martinin, Alejandro Balden dhe Joao Cancelon. Me këtë katërshe në fushë katalanasit e mbyllën fraksionin e dytë të 'El Clásico'-s, megjithatë loja e treguar gjatë atyre minutave la për të dëshiruar. Në këto rrethana, tekniku gjerman lutet që në ditët në vijim të ketë rikuperime nga infermierja. Aktualisht, Jules Kounde duket se është më pranë rikthimit dhe mund të marrë dritën jeshile nga mjekët për të zbritur në fushë në sfidën e kësaj fundjave kundër Alavesit.