Jose Mourinho thur elogi për yllin e Barcelonës: Është shumë i talentuar dhe jashtëzakonisht i zgjuar

Gjatë paraqitjes së tij në konferencën për shtyp, trajneri i Realit, Jose Mourinho ka analizuar në detaje përballjen e fortë mes Marc Cucurellës dhe Lamine Yamalit, duke i thurur elogi mbrojtësit për paraqitjen e tij ndaj talentit katalan dhe bashkëkombësit të tij spanjoll. “Cucurella pati një duel direkt me një futbollist të jashtëzakonshëm, i cili njëkohësisht është edhe shok i tij i skuadrës në kombëtare. Për mua është gjithmonë kënaqësi t'i shoh lojtarët e mëdhenj nga afër, vetëm dhjetë metra larg stolit tim. Pikërisht aty mund ta dallosh qartë klasin dhe cilësinë e tyre të vërtetë”, u shpreh ai fillimisht. Mourinho nuk i kurseu fjalët e lavdatës për aftësitë e anësorit të ri të Barcelonës, duke e cilësuar si një kundërshtar tejet të pakëndshëm në fushën e gjelbër. “Dhe ai djalosh është me të vërtetë i jashtëzakonshëm, një kundërshtar shumë i vështirë për t'u neutralizuar, pasi përveç talentit të spikatur, shquhet edhe për zgjuarsi të lartë në lojë”, u shpreh më tej strategu portugez. Sipas tij, Yamali bëri maksimumin për ta vënë në vështirësi mbrojtësin kundërshtar, por ky i fundit ia doli mbanë në mënyrë mbresëlënëse. “Ai u angazhua maksimalisht që t'i shkaktonte një karton të verdhë Cucurellës, por ky i fundit ia doli të menaxhonte situatën në mënyrë perfekte”, shtoi ai. Në fund, trajneri vlerësoi edhe kontributin e pjesës tjetër të ekipit në këtë duel vendimtar. “Në këtë aspekt, ndihmë të madhe i dha edhe Diomande, i cili nuk la hapësirë që Yamali dhe Cancelo të krijonin epërsi numerike. Për Cucurellën kjo ishte ndeshja më sfiduese e deritanishme, por ai rezultoi i shkëlqyer përballë një djaloshi që premton jashtëzakonisht shumë”, përfundoi Mourinho.