Tragjedi në Pejë: Gruaja dyshohet se u ekzekutua me sëpatë nga kunati i saj në Vitomiricë

Një ngjarje e rëndë tronditi mbrëmjen e sotme fshatin Vitomiricë të Pejës, ku një grua ka gjetur vdekjen në rrethana makabre, pasi dyshohet se është sulmuar për vdekje me sëpatë. Sipas informacioneve paraprake nga vendi i ngjarjes, autorëssia e këtij krimi të rëndë dyshohet të jetë nga familja e ngushtë, konkretisht kunati i viktimës. Lidhur me këtë ngjarje tragjike, zëdhënësi i Prokurorisë Themelore në Pejë, Shkodran Nikçi, ka konfirmuar për “Lajmet e Reja” se autoritetet më të larta hetimore dhe njësitë policore janë mobilizuar menjëherë, duke dalë në vendin e ngjarjes së bashku me kryeprokuoren dhe prokuroren e Krimeve të Rënda. “Ka ndodhur një vrasje, ndërsa në vendin e ngjarjes kanë dalë zyrtarë të Policisë së Kosovës, me të gjitha njësitë relevante, si dhe kryeprokurorja dhe prokurorja e Krimeve të Rënda”, ka deklaruar Nikçi. Ndërkohë, organet e rendit dhe drejtësisë po vazhdojnë hetimet intensive për të zbardhur plotësisht motivet dhe rrethanat e sakta që çuan në këtë akt të rëndë kriminal.