Bilanci tronditës në QKUK: Mbi 300 raste me kancer gjiri në dhjetë muaj, vetëm 13 paciente zgjodhën rikonstruksionin

Gjatë periudhës gati dhjetëmujore, Klinika e Kirurgjisë Torakale pranë Qendrës Klinike dhe Universitare të Kosovës ka regjistruar shifra alarmante të sëmundshmërisë, duke kryer gjithsej 710 ndërhyrje kirurgjikale në gji, ku 319 prej tyre janë konfirmuar si raste me kancer të gjirit. Drejtori i këtij institucioni shëndetësor, Nazmi Kolgeci, ka shpjeguar se pjesa tjetër e ndërhyrjeve ka përfshirë procedura diagnostikuese me gjilpërë dhe biopsi ekscizionale, për të sqaruar gjendjen e pacienteve. Sipas vlerësimeve të tij, incidenca e rasteve me kancer të gjiri gjatë viteve 2025 dhe 2026 paraqitet në përmasa të ngjashme. Megjithatë, duke pasur parasysh zvogëlimin e numrit të përgjithshëm të popullsisë në vend, ky fenomen, sipas Kolgecit, mund të sinjalizojë një rritje shqetësuese të rasteve. Në anën tjetër, interesimi për procedurat e rikonstruksionit të gjirit pas operacioneve mbetet jashtëzakonisht i ulët, pavarësisht nevojës estetike dhe psikologjike për pacientet. Kirurgu plastik, Ylber Zenjullahu, ka bërë të ditur se përgjatë këtij viti janë realizuar vetëm 13 ndërhyrje për rikonstruksionin e gjirit, pavarësisht fushatave dhe nxitjes së vazhdueshme që gratë t'i nënshtrohen këtij procesi pas shërimit. Ai ka shtuar se që nga nisja e ofrimit të këtij shërbimi janë kryer gjithsej 80 rikonstruksione, duke i cilësuar rezultatet e deritanishme si mjaft të suksesshme për ekipin mjekësor. Ndërkohë, trajtimi i ngjashëm në sektorin privat sjell kosto të konsiderueshme financiare për qytetaret, e cila ndryshon në bazë të llojit të ndërhyrjes dhe shpesh mund të kapërcejë shifrën e 3 mijë eurove, ka përfunduar ai.