Analiza e trazirave, Roland Islami: Dhuna në protesta nxitet, nuk përjashtohet përgjegjësia e policisë

I ftuar në një lidhje direkte në emisionin e përditshëm në Ora News, analisti Roland Islami ka analizuar nga rrënjët përshkallëzimin e situatës në protestat e fundit, duke hedhur hije dyshimi mbi veprimet dhe qasjen e strukturave të rendit. Sipas tij, tubimet publike mbeten një mekanizëm legjitim përmes të cilit qytetarët ngrenë zërin për pakënaqësitë e tyre, por ato shpesh përdoren nga qeverisja si një mundësi për të kontrolluar tensionet dhe për të orientuar dinamikat politike e institucionale në vend. Duke komentuar dëmet e shkaktuara në objekte dhe institucione, Islami theksoi se këto akte vandalizmi nuk duhet të trajtohen si incidente të shkëputura, por kërkojnë një analizë të thellë të sjelljes dhe operimit të policisë në terren gjatë zhvillimit të protestës. “Ky lloj shkatërrimi nuk vjen pa një nxitje të dhunës nga krahu tjetër”, u shpreh ai, duke ngritur pikëpyetje serioze mbi një tolerim apo neglizhencë të mundshme nga ana e efektivëve të rendit. Në vlerësimin e tij, ngjarjet nuk mund të reduktohen thjesht në një përleshje impulsive mes qytetarëve dhe shtetit, pasi dinamika e plotë kërkon domosdoshmërisht shqyrtimin e ndërveprimit mes palëve protestuese dhe strukturave policore. “Një protestues në rastin konkret nuk mund të bëjë veprime kundër institucioneve nëse nuk kemi të bëjmë me dy veprime: neglizhencën e policisë dhe dashjen direkte të institucioneve të policisë për të lejuar shkatërrimin e tyre”, deklaroi përfundimisht Roland Islami.