Eksperti amerikan: Kosova mund ta përdorë Gjykatën Speciale si çelës për anëtarësimin në Këshillin e Evropës

Profesori amerikan, Edward Joseph, ka sugjeruar se institucionet e Kosovës duhet të shfrytëzojnë momentumin për të dialoguar me Bashkimin Evropian rreth çështjeve që kanë të bëjnë me Gjykatën Speciale, me qëllim që kjo temë të ndërlidhet drejtpërdrejt me pranimin e vendit në Këshillin e Evropës. I ftuar në podcastin “PIKË”, njohësi i rrethaneve politike ka vlerësuar se ekziston një konvergjencë e interesave ndërmjet Kosovës, bllokut evropian dhe Uashingtonit zyrtar, e cila mund të prodhojë një mirëkuptim për t'i hapur dyert e kësaj organizate evropiane. “Ka përputhje me administratën që Kosova mund ta zbatojë dhe gjithashtu me Bashkimin Evropian në një mënyrë shumë të rëndësishme për të arritur një mirëkuptim, një marrëveshje që mund të përfshijë më në fund anëtarësimin e Kosovës në Këshillin e Evropës”, ka pohuar ai. Sipas vlerësimit të tij, një anëtarësim i tillë do t'i siguronte Kosovës një qasje zyrtare pranë Gjykatës Evropiane të të Drejtave të Njeriut, ku vendimet që ndërlidhen me proceset e Gjykatës Speciale do të kishin mundësi të kalonin nëpër filtrat e juridiksionit dhe standardeve përkatëse. “Kjo do të ishte një mundësi e jashtëzakonshme për Kosovën në lidhje me Specialen, sepse do të kishte një rrugë drejt Gjykatës Evropiane të të Drejtave të Njeriut dhe më pas do të mund të merrte shqyrtim të duhur gjyqësor. Kjo i shërben interesave të Kosovës”, u shpreh akademikja amerikan. Sidoqoftë, Joseph ka bërë të qartë se kjo strategji nuk nënkupton shmangie nga obligimet ndërkombëtare të vendit, por kërkim të një zgjidhjeje përmes bisedimeve konstruktive me aleatët perëndimorë. “Unë nuk po them se Kosova duhet t’i shpërfillë detyrimet e saj”, theksoi ai, duke shtuar se Brukseli mund t'i adresojë privatisht shqetësimet e veta mbi mbarëvajtjen e këtij procesi gjyqësor. Gjatë bashkëbisedimit, Joseph ka ngritur gjithashtu çështjen e lartësisë së dënimeve të shqiptuara nga kjo gjykatë, duke i cilësuar ato si disproporcionale, ndonëse ka ruajtur rezervën për një verdikt përfundimtar, duke pasur parasysh volumin e madh të provave. Në këtë kontekst, ai ka përmendur se ka hapësirë për debat publik rreth efikasitetit kohor, faturës financiare dhe buxhetit të gjykatës, si dhe krahasueshmërisë së dënimeve me praktikat e Tribunalit të Hagës. “Por asnjë gjykatë nuk është mbi kritikën”, përfundoi ai. Kujtojmë se Gjykata Speciale pati shqiptuar dënime totale prej 81 vjetësh burgim për katër ish-drejtuesit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.