Nico Williams sqaron të vërtetën: Agjenti im gaboi, refuzova gjigantët evropianë për Athletic Club

Saga e gjatë e transferimit të Nico Williams te Barcelona është shndërruar në një ndër temat më të komentuara të tregut të kalimtarëve gjatë kohëve të fundit. Sulmuesi anësor i Athletic Club vendosi përfundimisht të vazhdojë rrugëtimin e tij në “San Mames”, duke hedhur poshtë disa herë ofertat e katalanasve, ndonëse rrethanat e këtyre vendimeve kanë prodhuar vazhdimisht polemika. Tashmë, vetë lojtari ka marrë situatën në dorë për të vendosur pikat mbi i, duke dhënë një kundërshtim publik ndaj deklaratave të bëra nga agjenti i tij personal. Debati u ndez pas fjalëve të përfaqësuesit të tij, Felix Tainta, i cili diskutoi rreth interesimit intensiv të Barcelonës gjatë verës së vitit 2024, duke aluduar se dështimi i marrëveshjes erdhi kryesisht si pasojë e vështirësive financiare të klubit dhe rregullave të “fair-play”-it. Tainta kishte pretenduar se transferimi mbetej peng i garancive institucionale, duke theksuar se lojtari nuk mund të lejonte rrezikun e bllokimit të karrierës së tij te Barcelona. “Vjen një moment në negociata, në këtë situatë, kur Nico nuk mund të mbetet pa luajtur. Nico është një makinë e Formula 1”, ishte shprehur agjenti. Këto deklarata nuk u pritën mirë në mjedisin e “San Mames”, duke e detyruar Williamsin të sqarojë pozicionin e tij pas triumfit bindës që Athletic Club arriti ndaj Getafes të dielën. “Vëllai im ishte i qartë me atë që tha. Është e vështirë kur emri yt përfshihet në gjëra të tilla. Felix ka gabuar me fjalët që ka thënë, gjërat nuk janë ashtu. Vendimi përfundimtar merret nga unë, vëllai im dhe familja. Ajo që ndodh në shtëpi, e dimë vetëm ne të tre. Unë kurrë nuk kam dyshuar për qëndrimin tim këtu. Kam pasur oferta të panumërta, kam pasur mundësi të largohem dhe e kam bërë të qartë se dua të qëndroj këtu”, u shpreh ai. Futbollisti 23-vjeçar këmbënguli se përkushtimi i tij ndaj klubit bask ka mbetur i palëkundur, pavarësisht insistimit të shumë skuadrave elitare evropiane për ta siguruar kartonin e tij. “Synimi im është të jem këtu dhe kjo nuk duhet të vihet në dyshim. Barcelonës, Arsenalit, PSG-së dhe shumë të tjerëve u kam thënë jo, sepse isha këtu. Shpresoj që njerëzit ta kuptojnë”, shtoi ai. Pasi zyrtarizoi vazhdimin e bashkëpunimit përmes një kontrate të re që skadon në qershor të vitit 2035, Williams u ndal edhe te zërat kritikë që e kanë shoqëruar në rrjetet sociale. “Rrjetet sociale nuk janë jeta reale. Ti qëndron me njerëzit që vijnë në Lezama dhe aty ka fëmijë të panumërt që duan të jenë si unë. Ata më shikojnë, sepse dua të bëhem një figurë e madhe referimi”, përfundoi ai. Këto zhvillime nuk pritet të prodhojnë ndonjë shqetësim për drejtuesit e Barcelonës, të cilët tashmë kanë mbyllur këtë kapitull dhe janë fokusuar në objektiva të tjerë, pa pasur më asnjë interesim aktiv përfaqësuesin e kombëtares spanjolle.