Nisja makthi për Partizanin: “Arena e Demave” vonohet, të kuqtë zhytur në vendin e fundit

Pritja e gjatë për t’u zhvendosur në stadiumin e ri “Arena e Demave” po rezulton një kalvar më vete për klubin e Partizanit, pasi punimet po kërkojnë më shumë kohë sesa ishte parashikuar. Edhe pse afati i parë ishte caktuar për muajin tetor, ai synim mbeti vetëm në letër. Kjo periudhë e re e kampionatit po shfaqet si një periudhë e errët për skuadrën kryeqytetase, e cila megjithëse llogaritet si ekip pritës, po luan në kushtet e një udhëtimi të vazhdueshëm. Në tetë javët e para, të kuqtë kanë zhvilluar pesë ndeshje në shtëpi, por kanë arritur të sigurojnë vetëm një pikë të vetme, ndërsa katër humbjet radhazi para tifozëve të tyre kanë krijuar një alarm të kuq në ambientin e klubit. Kjo ecuri anormale e ka detyruar Partizanin të presë kundërshtarët në impiante alternative si në Vorë, Rrogozhinë apo në stadiumin “Air Albania”. Bilanci flet qartë për këtë krizë: vetëm 4 gola të realizuar dhe 11 të pranuar. Për më tepër, ky start i sezonit përbën një rekord negativ historik për klubin, pasi kurrë më parë në tetë javët e para të Superiores Partizani nuk kishte regjistruar vetëm 4 pikë në total, duke u gjendur aktualisht në vendin e fundit të tabelës së klasifikimit. Më poshtë jepen ndeshjet e zhvilluara nga Partizani në rolin e pritës: Java e parë: Partizani 0-0 Teuta (Stadiumi i Vorës) Java e dytë: Partizani 1-2 Laçi (Stadiumi “Arena Egnatia”) Java e katërt: Partizani 2-4 Dinamo (Stadiumi i Vorës) Java e gjashtë: Partizani 1-3 Tirana (Stadiumi “Air Albania”) Java e tetë: Partizani 0-2 Skënderbeu (Stadiumi i Vorës)