Tronditje te Drenica, Jeton Mehmeti largohet nga drejtimi i skuadrës

Klubi i futbollit Drenica ka mbetur pa trajnerin e parë, pasi Jeton Mehmeti ka vendosur të heqë dorë përfundimisht nga ky post. Këtë vendim e ka bërë të ditur vetë tekniku përmes një njoftimi të publikuar në llogarinë e tij zyrtare në rrjetet sociale. Në mesazhin e tij drejtuar opinionit sportiv, Mehmeti ka përmbledhur kohën e kaluar në krye të skuadrës nga Skenderaj, duke e cilësuar si një fazë të shoqëruar me sfida, por edhe me momente pozitive. Ai ka shprehur mirënjohje për kryetarin Halim Bajraktari për besimin e treguar, si dhe për të gjithë komponentët e klubit, nga futbollistët e deri te stafi mbështetës. Gjithashtu, ai ka falënderuar mbështetësit dhe kritikët, duke theksuar se rrethanat e krijuara së fundmi e kanë bërë të pamundur vijimin e mëtejshëm të punës. Sakaq, ai ka vënë inë pah përkushtimin dhe profesionalizmin e treguar gjatë kësaj periudhe, duke shtuar se rezultatet flasin vetë dhe se skuadra ka arritur të tejkalojë çdo parashikim inicial. Mehmeti është larguar me ndërgjegje të qetë dhe krenar për punën e bërë në udhëheqjen e ekipit kuqezi. Për momentin, pas përfundimit të javës së 11-të në elitën e futbollit kosovar, Drenica pozicionohet në vendin e shtatë të tabelës, duke arkëtuar gjithsej 11 pikë.