Kushtet e Uashingtonit për Kosovën: Çfarë duhet të ndodhë që të rinis dialogu strategjik?

Shtetet e Bashkuara të Amerikës mbeten të gatshme për të rivendosur dialogun strategjik me Kosovën, mirëpo kërkojnë që paraprakisht të krijohen rrethanat e duhura, duke vënë theksin te zbatimi i zotimeve që Prishtina ka ndaj komunitetit serb. Nga ana tjetër, ndërkohë që ekzekutivi dhe Presidenca ende nuk kanë bërë publike hapat e tyre për ta zhbllokuar këtë çështje, partitë opozitare i bëjnë thirrje kabinetit të ri qeveritar që të ndërmarrë veprime të menjëhershme dhe konkrete. Kujtojmë se partneriteti strategjik ndërmjet dy vendeve u pezullua pa afat në shtator të vitit 2025, si pasojë e shqetësimeve të Uashingtonit zyrtar lidhur me vendimet e qeverisë së atëhershme në detyrë, e cila drejtohej nga Kurti. Në një prononcim zyrtar me shkrim, një zëdhënës i Ambasadës Amerikane në Prishtinë ka theksuar se Shtetet e Bashkuara janë plotësisht të përkushtuara për të çuar përpara interesat e përbashkëta të dy popujve. Megjithatë, i njëjti ka qenë i prerë se bisedimet për rifillimin e këtij formati nuk mund të ndodhin pa u përmbushur kushtet paraprake lidhur me serbët e Kosovës. "Shtetet e Bashkuara pezulluan për një kohë të pacaktuar dialogun strategjik SHBA-Kosovë në shtator 2025 për shkak të shqetësimeve mbi veprimet që kishte ndërmarrë qeveria e atëhershme në detyrë. Ne mbetemi të përkushtuar për të çuar përpara interesat e përbashkëta të Shteteve të Bashkuara dhe popullit të Kosovës. Ne presim me padurim të zhvillojmë një dialog strategjik me Kosovën kur kushtet të jenë të përshtatshme, duke përfshirë përmbushjen e angazhimeve të saj nga Kosova në lidhje me serbët e Kosovës", ka deklaruar zëdhënësi i Ambasadës Amerikane. Spektri opozitar vlerëson njëzëri se barra kryesore për të zhbllokuar këtë proces jetik i takon Qeverisë, e cila duhet të dëshmojë vullnet përmes rezultateve të prekshme, ndërkaq angazhimin e presidentes e shohin vetëm si një mbështetje shtesë. Lutfi Haziri, deputet i Lidhjes Demokratike të Kosovës, ka ritheksuar se kabineti qeveritar duhet patjetër të dëshmojë punë konkrete në mënyrë që procesi të zhbllokohet, duke shtuar se pavarësisht hapësirës për rolin e presidentes Justina Shiroka-Pula, përgjegjësia mbetet institucionale e Qeverisë. Haziri: Qeveria duhet të demonstrojë rezultate konkrete për rifillimin e dialogut strategjik me SHBA-në “Presidentja mund ta ketë një lloj roli, por dialogu strategjik me SHBA-në është dhe ka mbetur problem i Qeverisë, për shkak të sjelljes që Qeveria ka vendosur. Ky suspendim i përkohshëm dhe Qeveria duhet të demonstrojë rezultate të prekshme për me e zhblloku. Sekretari Rubio dhe mekanizmat e State Department-it janë shumë të qartë dhe zhbllokimi dhe normalizimi drejt një arritjeje të këtij qëllimi realisht duhet të garantohet nga ana e Qeverisë. Presidentja mund të ketë një rol dhe të tjerët kanë një rol, por burimi i saj ka qenë Qeveria dhe Qeveria duhet të jetë zhbllokuese”, ka deklaruar Haziri. Edhe Burim Ramadani, deputet nga radhët e Aleancës, ka alarmuar mbi domosdoshmërinë e rikthimit të këtij dialogu, duke kërkuar një qasje shumë më gjithëpërfshirëse nga ana e institucioneve dhe angazhim direkt nga ekzekutivi. Ramadani: Dialogu strategjik me Shtetet e Bashkuara të Amerikës është domosdoshmëri të kthehet “Dialogu strategjik me Shtetet e Bashkuara të Amerikës është domosdoshmëri të kthehet, të fillojë realisht, sepse nuk ka qenë i filluar. Dhe në të njëjtën kohë, kjo nënkupton një qasje shumë më gjithëpërfshirëse institucionale, e mbi të gjitha të Qeverisë.”