Prishtina gjobitet me 5 mijë euro nga Inspektorati i Mjedisit për keqmenaxhim të mbeturinave

Drejtoria e Inspekcionit e Komunës së Prishtinës është ndëshkuar me një gjobë prej 5 mijë eurosh nga Inspektorati i Mjedisit, si pasojë e mosrespektimit të detyrimeve ligjore në fushën e menaxhimit të deponive të dheut dhe mbeturinave vëllimore. Lajmi është bërë i ditur nga ministrja e Mjedisit, Fitore Pacolli, e cila ka shpjeguar se masa ndëshkimore ka ardhur pas konstatimit se në deponinë e dheut të ndërmarrjes publike lokale “Gjelbër”, si dhe në terrenet përreth, janë hedhur mbeturina vëllimore jashtë perimetrit të caktuar të deponisë. Sipas ministres Pacolli, pavarësisht paralajmërimeve dhe thirrjeve të njëpasnjëshme drejtuar organit komunal për të marrë masa frenuese, nuk është ndërmarrë asnjë veprim konkret për zgjidhjen e kësaj problematike mjedisore.