Gara në LDK, Lushaku-Sadriu tregon kushtin për Përparim Ramën dhe flet për fatin e Abdixhikut

Shefja e Grupit Parlamentar të Lidhjes Demokratike të Kosovës (LDK), Jehona Lushaku-Sadriu, ka shqyrtuar ambiciet e Përparim Ramës për t'u bërë kryetar i partisë, thirrjet për dorëheqjen e kreut aktual Lumir Abdixhiku, si dhe gjasat që ky i fundit të kërkojë një mandat tjetër në krye të forcës politike. Gjatë një paraqitjeje në emisionin “Intervista e javës”, Lushaku-Sadriu u shpreh se e respekton aspiratën e Ramës për të synuar udhëheqjen e partisë, por vuri theksin tek rregullat statutore, sipas të cilave çdo kandidat për kryetar duhet paraprakisht të jetë anëtar i LDK-së. Ajo theksoi se dyert e subjektit janë të hapura për këdo që dëshiron t'i bashkohet, duke mirëpritur një garë të hapur dhe demokratike. “Sidoqoftë, unë e respektoj ambicien e tij për të shpallur kandidaturë. Gjithsesi, unë besoj që ka një rrugëtim se si mund të vish edhe të bëhesh kryetar. S'ka mundësi që, nëse nuk je anëtar i LDK-së, të jesh kryetar i saj. Të synosh të bëhesh, po. Po gjithsesi, në LDK janë të mirëpritur të gjithë ata që kanë dëshirë me qenë anëtarë të LDK-së, të jenë të LDK-së. Absolutisht, kjo nuk është një dëshirë që mund t'i mohohet dikujt. Patjetër, unë njoh të drejtat e njerëzve për të qenë edhe për të pasur dëshirë për kryetar. Mendoj që edhe brenda LDK-së ka shumë që kanë dëshirë që të jenë kryetarë të LDK-së edhe mendoj që gara do të jetë e hapur”, deklaroi ajo. Lidhur me kërkesat e Ramës që Lumir Abdixhiku të lërë postin e kryetarit, ajo refuzoi të lëshojë në komente të drejtpërdrejta për të mos u dukur e njëanshme. Megjithatë, ajo kujtoi se partitë mbajnë përgjegjësi për strukturat, platformat dhe kandidatët e tyre, ndërsa individët që garojnë nën logon e një subjekti duhet të dëshmojnë llogaridhënie ndaj tij dhe vlerave që ai përfaqëson. “Këto janë pikëpamje të zotit Rama, të cilat nuk dëshiroj që t'i diskutoj sepse mund të merren edhe si të njëanshme, por që nuk mendoj që janë vlerësime, po janë mendime të tij, të cilat ai ka të drejtë t'i shprehë ato publikisht nëse mendon që ato qëndrojnë. Sidomos, dëshiroj që të them një gjë, që partia politike është përgjegjëse për kandidatët e vet edhe është përgjegjëse për platformën politike dhe për garën politike... Përndryshe, mund të jesh kandidat i pavarur edhe unë do të mund të garoja si deputete e pavarur, po jam në kornizën e LDK-së dhe i përfaqësoj ato vlera që më jep besim elektorati i LDK-së para së gjithash”, u shpreh ajo. Sa i takon mundësisë që Abdixhiku të rikandidohet për një mandat të ri, Lushaku-Sadriu bëri të ditur se një vendim i tillë i takon personalisht atij. Sipas saj, kreu i LDK-së do të analizojë me kujdes punën e bërë, mbështetjen e gjerë dhe opinionin publik përpara se të marrë një vendim përfundimtar për angazhimin e tij në garën e ardhshme.