Debat i ashpër në Komision: Opozita thotë se Projektligji për Byronë e Pasurisë ka ende boshllëqe ligjore

Shqyrtimi i Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme ka sjellë përplasje dhe diskutime intensive gjatë mbledhjes së Komisionit për Legjislacion. Gjatë këtij takimi, deputetja e Lidhjes Demokratike të Kosovës (LDK), Doarsa Kica-Xhelili, ka theksuar se pavarësisht përmirësimeve dhe adresimit të disa çështjeve, nisma e propozuar vazhdon të shfaqë mangësi të theksuara. Ndër vërejtjet kryesore të ngritura nga deputetja opozitare është fakti se procedura e zgjedhjes dhe votimit të drejtorit të kësaj buroje ka mbetur e pandryshuar, duke ngritur shqetësime për mënyrën e funksionimit të saj në të ardhmen.