Fluks dhe pritje të gjata në kufij: Kolona në Tabanoc, vonesa edhe në Bllacë e Deve Bair

Fluks i lartë i automjeteve dhe radhë të gjata janë shënuar këtë mëngjes në disa nga pikat kyçe kufitare të vendit. Sipas njoftimeve nga Lidhja Auto-moto e Maqedonisë (LAMM), situata më problematike paraqitet në vendkalimin e Tabanocit, ku udhëtarët që synojnë të lënë vendin po detyrohen të presin mbi një orë. Vonesa dhe ngadalësim i qarkullimit regjistrohen gjithashtu në pikën kufitare të Bllacës në drejtim të Kosovës, ku koha e pritjes arrin në rreth 30 minuta, si dhe në Deve Bair në kufirin me Bullgarinë, ku dalja nga vendi po merr afërsisht 20 minuta. Në nyjat e tjera kufitare të territorit vendës nuk raportohen bllokada apo pritje të spikatura për hyrje-dalje. Nga LAMM bëjnë me dije se aktualisht qarkullimi rrugor zhvillohet në kushte normale dhe në rrugë të thata, por u bëhet thirrje drejtuesve të automjeteve që të tregojnë kujdes të shtuar. Vëmendje e veçantë kërkohet gjatë kalimit nëpër gryka malore dhe lugina, ku paraqitet rrezik potencial për shembje dhe rrëshqitje të dheut. Sipas autoriteteve, akset rrugore më të ekspozuara ndaj këtij rreziku mbeten Katllanovë - Veles, Mavrovë - Dibër - Strugë, Koçan - Delçevë, si dhe lidhja ndërmjet Vinicës dhe Berovës.