Skemë mashtrimi me kriptovaluta në dëm të suedezëve: Pranga nëntë personave në Prishtinë

Prokuroria Themelore në Ferizaj ka bërë të ditur se, me urdhër të Prokurorit të Shtetit nga Departamenti i Përgjithshëm, janë ndaluar për 48 orë nëntë persona të dyshuar, të identifikuar me inicialet P.R, A.P, F.Z, D.H, B.E, T.S, D.H, R.H dhe D.M. Të arrestuarit dyshohen se janë përfshirë në veprën penale të mashtrimit. Sipas hetimeve paraprake, ky aktivitet i paligjshëm dyshohet se është shtrirë gjatë vitit 2026, në disa pika të ndryshme brenda kryeqytetit, në Prishtinë. Të pandehurit, duke vepruar në bashkëpunim si grup i strukturuar, përmes paraqitjes së rreme të fakteve dhe me qëllim të përfitimit të kundërligjshëm pasuror, kanë mashtruar shtetas të huaj, konkretisht shtetas suedezë. Ata i kanë nxitur viktimat që të ndërmarrin veprime në dëm të pasurisë së tyre, duke shfrytëzuar qendra thirrjesh (Call Center) ilegale. Të dyshuarit janë prezantuar si agjentë investimesh në monedha digjitale, specifikisht në Bitcoin, ndërsa pas kryerjes së investimeve, fondet e viktimave janë transferuar në llogari bankare të panjohura, duke u shkaktuar atyre dëme të konsiderueshme financiare. Gjatë ndërhyrjes policore për arrestimin e tyre, dy prej të pandehurve, R.H dhe D.H, kanë bërë rezistencë dhe kanë sulmuar pjesëtarët e Policisë së Kosovës gjatë përmbushjes së detyrave të tyre zyrtare. Për këtë arsye, ndaj tyre rëndojnë edhe dyshimet shtesë për kryerjen e veprës penale të sulmit ndaj personit zyrtar.