Zjarr dhe dëme të rënda në zyrat e “Dritare TV”, reagon gazetarja Rudina Xhunga: Kishim fat që shpëtuam njerëzit

Një ngjarje e rëndë ka prekur ambientet e një kompleksi rezidencial, ku ndodhen gjithashtu zyrat e medias online “Dritare TV”, pasi një zjarr ka shpërthyer papritur duke shkaktuar dëme të konsiderueshme materiale. Flakët kanë goditur rëndë regjinë e transmetimit të kësaj medie. Drejtuesja dhe gazetarja e njohur, Rudina Xhunga, ka ndarë detaje dramatike rreth ngjarjes, duke shpjeguar se zjarri e ka origjinën te tubat e aspirimit të një restoranti, për t'u përhapur më pas me shpejtësi drejt hapësirave të zyrave. Ajo ka bërë të ditur se flakët depërtuan në redaksi vetëm pak çaste pasi ishte mbyllur procesi i xhirimit për dy emisione televizive. “Po digjeshim”, është shprehur Xhunga, duke sjellë ndërmend çastet e panikut kur prioriteti kryesor ishte evakuimi i stafit, shkëputja e energjisë elektrike përmes automateve dhe thirrja e zjarrfikësve, të cilët i ka falënderuar publikisht për reagimin e shpejtë në terren. Përveç dëmeve nga flakët, ndërhyrja për shuarjen e zjarrit dhe shkrirja e tubave të shkarkimit të ujërave dhe të shiut kanë sjellë përmbytjen e të gjitha mjediseve të brendshme. Xhunga ka konfirmuar se uji ka vazhduar të depërtojë në hapësirat e dëmtuara edhe gjatë ditës së sotme. Ndërkohë, ajo ka njoftuar se janë ndërmarrë hapat ligjorë duke bërë kallëzime pranë Policisë dhe Prokurorisë, ndërsa ka përcjellë edhe një dedikim për shikuesit besnikë të “Dritare TV”. “Na falni për këtë periudhë me pak aktivitet! Por do të vijojmë të jemi bashkë”, ka deklaruar drejtuesja e medias online, Rudina Xhunga.