Lionel Scaloni drejt rinovimit historik, do të udhëheqë Argjentinën deri në Kupën e Botës 2030

Shtëpia e futbollit argjentinas dhe selektori Lionel Scaloni po ecin me hapa të sigurt drejt arritjes së një akordi të ri për vazhdimin e bashkëpunimit. Ky dakordim pritet të zyrtarizohet gjatë afatit të ardhshëm të ndeshjeve të kombëtareve, duke i dhënë mundësinë strategut argjentinas të drejtojë ekipin kombëtar në atë që do të shënonte paraqitjen e tij të tretë në një Botëror. Vetë trajneri ka komentuar mbi situatën e tij duke u shprehur: “Nëse gjithçka shkon mirë, do të vazhdoj si trajner, por për momentin nuk ka asgjë të re”. Ndërkohë, burimet konfirmojnë se bisedimet zyrtare mes palëve kanë kaluar në një dimension kyç. Besnikëria ndaj pankinës bardhekaltër parashikohet të nisë me një marrëveshje dyvjeçare, e cila përfshin opsionin e vazhdimit edhe për dy vite të tjera, duke e garantuar praninë e tij deri në Kupën e Botës 2030. Në këtë kontratë pritet të përfshihet edhe një klauzolë e kushtëzuar me “Copa América 2028”, e cila do të aktivizonte zgjatjen automatike të mandatit. Synimi kryesor i drejtuesve të federatës është ruajtja e integritetit të stafit teknik që solli sukseset e jashtëzakonshme për Argjentinën gjatë gjashtë viteve të fundit. Megjithatë, mbetet ende për t'u shqyrtuar pozicioni dhe e ardhmja e Ëalter Samuel, një prej bashkëpunëtorëve më të afërt dhe afatgjatë të Scalonit në ekipin teknik.