Ndryshon orari i seancës në Apel për vrasjen e Liridona Ademajt, ja kërkesa e mbrojtjes

Gjykata e Apelit ka njoftuar se është bërë një ndryshim në orarin e mbajtjes së seancës gjyqësore për rastin e vrasjes së Liridona Ademajt. E parashikuar fillimisht për datën 29 tetor 2026 në orën 09:50, kjo seancë tashmë do të nisë në orën 11:10. Në njoftimin zyrtar të institucionit të drejtësisë theksohet se data e caktuar mbetet e pandryshuar dhe se intervenimi në orar ka ardhur me kërkesë të palës mbrojtëse të të dënuarit N.M. Arsyeja e këtij ndryshimi është angazhimi i tij në të njëjtën datë dhe orar për të përfaqësuar një çështje tjetër pranë Gjykatës Supreme. Kjo seancë do të shërbejë për shqyrtimin e ankesës së depozituar nga Naim Murseli, i cili është dënuar me burgim të përjetshëm për privimin nga jeta të bashkëshortes së tij, Liridona Ademaj. Ankesa prej 30 faqesh, e dorëzuar nga dy avokatët e Murselit, synon prishjen e aktgjykimit aktual ose alternativisht shqiptimin e një dënimi më të butë për të. Në dokumentin e ankesës, mbrojtja akuzon gjykatën e shkallës së parë për vlerësim të njëanshëm dhe selektiv të provave, ndërsa ngre dyshime edhe rreth mënyrës se a është proceduar drejt gjatë marrjes në pyetje të Murselit nga ana e policisë. Po ashtu, avokatët argumentojnë se gjykata ka shpërfillur disa nga kërkesat e tyre thelbësore, duke përfshirë këtu propozimin për rikonstruktimin e skenës së krimit dhe ekzaminimin e veshjeve të Murselit. Në anën tjetër, në Gjykatën e Apelit ka dorëzuar ankesën e tij edhe Leotrim Syla, avokati i familjes së të ndjerës Liridona Ademaj. Nëpërmjet kësaj ankese, pala përfaqësuese e viktimës kërkon nga Kolegji i Apelit që, krahas Naim Murselit dhe Granit Plavës që mbajnë dënimin me burgim të përjetshëm, me të njëjtën masë dënimi të ndëshkohet edhe Kushtrim Kokalla.