E ardhmja e Spallettit te Juventusi në fije të peri: Ndeshjet e ardhshme vendimtare për fatin e trajnerit

Drejtuesit e Juventusit kanë vendosur të vazhdojnë bashkëpunimin me Luciano Spallettin, megjithëse besimi i klubit ndaj teknikut toskan mbetet i kushtëzuar dhe me kohë të matur. Strategu i "Zonjës së Vjetër" do të vijojë të drejtojë skuadrën nga pankina, ndërkohë që krerët e klubit i kërkojnë me ngulm formula konkrete për të përmirësuar menjëherë ecurinë e skuadrës. Në këtë situatë delikate, provat e vërteta për Spallettin do të jenë përballjet radhazi ndaj Rennes në Ligën e Evropës, si dhe ndeshjet e kampionatit kundër Lecces dhe Genoas. Këto takime nuk do të vlerësohen vetëm për aspektin numerik dhe pozicionin në tabelë, por sidomos për të dëshmuar nëse trajneri ruan ende kontrollin e plotë mbi dhomat e zhveshjes dhe grupin e lojtarëve. Disfata e rëndë pësuar në "Allianz Stadium" përballë Lazios rrezikon të shënojë një pikë kthese negative në rrugëtimin bardhezi të Spallettit. Prej një viti në krye të pankinës në Torino, trajneri ka dështuar kryesisht t'i japë skuadrës identitetin e premtuar që në ditën e parë të prezantimit, kur shprehte hapur ambicien për titullin kampion. Pas 12 muajsh pune, bilanci i Spallettit paraqitet madje më i zbehtë se ai i Igor Tudor në të njëjtën periudhë të sezonit të kaluar, me 11 pikë të grumbulluara krahasuar me 12 të kroatit. Përtej rezultateve, problematikat lidhen me parimet e lojës që nuk janë përkthyer kurrë në fushë, si dhe me shenjat e dukshme të përçarjes në grup gjatë javëve të fundit – duke nisur nga pakënaqësia e shprehur nga Conceiçao ndaj Celta Vigos, e deri te deklaratat e Bremer pas ndeshjes me Lazion, ku kapiteni brazilian u detyrua të sqarohej me pjesën tjetër të skuadrës. Pavarësisht kësaj panorame, Juventusi nuk po shqyrton shkarkimin e menjëhershëm të teknikut, ndonëse në prapaskenë kanë nisur të qarkullojnë emrat e zëvendësuesve të mundshëm, ku në krye të listës qëndron idhulli i tifozerisë, Antonio Conte. Nga ana e tij, Luciano Spalletti nuk ka ndërmend të dorëzohet, aq më tepër që ai pranoi drejtimin e Juventusit me një marrëveshje fillestare 8-mujore, me synimin për të rifituar dimensionin e tij pas eksperiencës jo të lumtur në krye të Kombëtares italiane. Megjithatë, për të vijuar këtë aventurë, ky kurs kërkon një kthesë të menjëhershme.