Gashi i kërkon opozitës të ndryshojë kursin pas lajmeve për Grenellin: Mjaft me akuza të lehta, përqendrohuni te ekonomia dhe arsimi

Pas publikimit të lajmeve rreth hetimeve ndaj ish-të dërguarit amerikan Richard Grenell, ka reaguar analisti politik Shkëlzen Gashi. Ai i ka bërë thirrje subjekteve opozitare në Kosovë që të heqin dorë nga etiketimet politike ndaj kryeministrit Albin Kurti dhe të përqendrojnë energjitë e tyre te sfidat reale në sektorët e arsimit, shëndetësisë, ekonomisë dhe drejtësisë. Në një postim të tij, Gashi ka theksuar se kritika ndaj qeverisë kërkon angazhim dhe përgatitje, ndërsa akuzat e paprovuara kërkojnë vetëm një mikrofon. Sipas tij, opozita duhet të reflektojë pas zhvillimeve të fundit lidhur me Grenellin dhe të kuptojë se kundërshtarët politikë nuk mund të shënjestrohen vazhdimisht me etiketa të rënda. Analisti ka nënvizuar se mendësia e sulmeve të përsëritura, të cilat sipas tij kanë zgjatur tash e gjashtë vjet, duhet të marrë fund. Ai ka përsëritur se mospajtimi politik nuk e bën askënd shërbyes të interesave të huaja dhe se opozita duhet t'i ofrojë qytetarëve alternativa konkrete për zhvillimin e vendit, duke dëshmuar dështimet e qeverisë përmes fakteve dhe jo përmes fushatave linçuese.