Hetim zyrtar nga Shtëpia e Bardhë: Trump vë në shënjestër ish-bashkëpunëtorin e tij, Richard Grenell

Kreu i shtetit amerikan, Donald Trump, ka kërkuar zyrtarisht hapjen e hetimeve ndaj njërit prej bashkëpunëtorëve të tij të dikurshëm më të ngushtë, Richard Grenell. Sipas të dhënave të bëra publike nga mediumi “Axios”, brenda administratës në Shtëpinë e Bardhë është zbuluar një skemë e dyshuar e “pagesave për ndikim” pranë Trumpit. Në epiqendër të këtij skandali ndodhet një sugjerim i pretenduar që Grenelli ia kishte drejtuar sipërmarrësit turk, Turhan Mildon, gjatë muajit maj të vitit të kaluar. Në atë kohë, Grenell, i cili ushtronte detyrën e drejtuesit të qendrës kulturore “Kennedy Center”, e kishte udhëzuar Mildonin që të kalonte afërsisht 17 milionë dollarë në llogarinë e firmës “Texas Armament & Technology”, prej të cilave rreth 6 milionë dollarë ishte paraparë të shkonin për institucionin e arteve. “Sapo që paratë të vijnë te kompania këtu, do të aranzhoj donacionin te ‘Kennedy Center’, dhe ju do t’iu bashkoheni ngjarjeve VIP dhe të jeni të afërt me administratën, madje edhe me presidentin e Shteteve të Bashkuara të Amerikës”, citohet të ketë thënë Grenell në mesazhin e tij. Në anën tjetër, Richard Grenell i ka hedhur poshtë kategorikisht këto akuza, duke i cilësuar ato si plotësisht të pavërteta. Ndërkaq, bashkëshortja e Mildonit, avokatja Alina Habba, ka bërë të ditur se “Kennedy Center” nuk e ka pranuar kurrë këtë donacion. Ajo raportohet se gjatë këtij muaji është takuar me presidentin Trump për çështjen e Grenellit, bazuar në shkrimet e “Axios” dhe “The New York Times”. Pas këtij takimi, kreu i Shtëpisë së Bardhë ka urdhëruar nisjen e menjëhershme të hetimeve. Vlen të kujtohet se Richard Grenell ka mbajtur pozitën e të dërguarit të posaçëm të Trumpit për bisedimet ndërmjet Kosovës dhe Serbisë gjatë intervalit kohor 2019-2021.