Artan Fuga del në mbrojtje të studentëve: Janë paqësorë, çdo tentativë për t'i dhunuar është krim

Profesor Artan Fuga ka reaguar ashpër përmes një postimi në rrjetet sociale, duke theksuar se studentët gëzojnë gjithmonë të drejtën dhe se ata nuk përfaqësojnë aspak dhunën. Ai ka lëshuar një thirrje të fortë që askujt të mos i shkojë në mendje të kryejë atë që e cilëson si një krim kombëtar ndaj tyre. Duke shprehur bindjen e tij të plotë se të rinjtë nuk kanë prirje psikologjike të dhunshme, Fuga është shprehur se ndër vite ka vërejtur me dhimbje se ata priren më shumë të vuajnë në heshtje vështirësitë dhe ankthin për të ardhmen, sesa të ngrihen me mobilizim për të kërkuar të drejtat e tyre. Sipas tij, studentët besojnë te vlerat bazë të shoqërisë dhe nuk kanë interes te dhuna, pasi synojnë të garojnë në mënyrë paqësore dhe të ndërtojnë karrierën e lor përmes aftësive. Akademiku ka refuzuar me forcë çdo insinuatë apo etiketim nga mediat, propaganda qeveritare apo qarqe të caktuara, që sipas tij përpiqen të njollosin studentët duke i akuzuar padrejtësisht për akte vandalizmi apo përleshje me policinë pa asnjë provë. Ai shtoi se edhe nëse ndonjë individ i veçantë mund të jetë përfshirë rastësisht në ndonjë ngjarje të tillë, kjo nuk mund të përdoret për të njollosur të gjithë trupën studentore. Fuga ka nënvizuar se studentët nuk janë thjesht e ardhmja e vendit, por shtresa më e kulturuar dhe shpresa e emancipimit të shoqërisë shqiptare. Ai ka paralajmëruar se çdo ndalim apo trajtim i tyre jashtë kuadrit ligjor cenon jo vetëm universitetin, betonin e kulturës kombëtare, por i hap plagë të rënda shoqërisë. Në përfundim, pedagogu ka theksuar se të rinjtë kanë nevojë urgjente të dëgjohen nga qeveria, politika dhe stafi akademik, pasi ata janë zhgënjyer nga premtimet boshe, mungesa e meritokracisë dhe abuzimi me besimin e tyre ndër vite.