Kryeministri Rama: Rreth 200 policë dhe 80 protestues të lënduar, kjo është luftë hibride me ndikim të huaj

Kryeministri Edi Rama ka hedhur poshtë akuzat për përdorim të tepruar të forcës nga ana e strukturave të rendit ndaj manifestuesve, duke theksuar se bilanci i efektivëve të lënduar tejkalon ndjeshëm atë të qytetarëve pjesëmarrës në tubime. Duke iu referuar të dhënave zyrtare, ai njoftoi se rreth 200 punonjës të policisë kanë marrë trajtim mjekësor në spital, ndërkohë që numri i protestuesve të lënduar llogaritet në afro 80 persona. Sipas kreut të qeverisë, pretendimet për dhunë policore bien poshtë kur analizohen statistikat reale të terrenit. “Ka një fakt shumë të thjeshtë, elementar: aty ku përdoret forca disproporcionale, raporti mes të lënduarve në anën e protestuesve dhe atyre në anën e policisë, natyrisht që është një raport i zhdrejtë, ku qartësisht ka më shumë protestues të lënduar sa policë të lënduar”, u shpreh kryeministri, duke paraqitur më tej shifrat konkrete të ngjarjeve. “Sot që flasim, se kam shifrën konkrete të fundit, por jemi deri afër 200 efektivë policie të lënduar, të plagosur, që kanë shkuar dhe kanë marrë ndihmë në spital, dhe jemi diku te 80 të lënduar nga ana e protestuesve, ndër të cilët më pak se gjysma janë studentë. Të tjerët janë të rinj, por aspak studentë, aspak nxënës. Të rinj që i përkasin grupit të zjarrit”, shtoi ai. Gjatë fjalës së tij, Rama ngriti shqetësimin se protestat po instrumentalizohen nga faktorë të ndryshëm me qëllim prodhimin e destabilitetit, duke lënë të kuptohet se ka edhe ndërhyrje nga jashtë kufijve. “Ky është sulm që zhvillohet në një perimetër të mirëorkestruar, që ushqehet me benzinë si zjarr i brendshëm nga aktorë të huaj, gjë që tanimë po bëhet çështje e madhe në gjithë Europën dhe ku ju projektohet qytetarëve një realitet i kombinuar, hibrid. Është një luftë hibride, e cila natyrisht funksionon deri në këtë masë, sepse bazohet në shqetësime reale”, deklaroi Rama. Kryeministri pranoi hapur se shqetësimet e qytetarët lidhur me kostot e jetesës dhe mundësitë e strehimit janë të bazuara në realitet, por sipas tij, ato po keqpërdoren për agjenda të errëta. “Janë reale shqetësimet për kostot e jetesës, për të nesërmen e sigurt në raport me strehimin, me mundësitë për të pasur më shumë, etj.”, theksoi ai. Në vijim të reagimit të tij, kreu i ekzekutivit lëshoi akuza të forta edhe ndaj një pjese të mediave, për të cilat u shpreh se po orientojnë pasqyrimin e ngjarjeve në shërbim të interesave të caktuara politike e financiare, duke zbehur fokusin te çështjet e arsimit. “Më keq se agresioni i gurëve është agresioni i mediave, të rreshtuara në front për interesa krejt të tjera, jo për arsim më të mirë. Interesa të lidhura me paranë, me politikën, me pushtetin, në kuptimin e nevojës ulëritëse për të përdorur këtë shqetësim social dhe për ta kthyer në zjarr dhe valë gurësh për të rrëzuar qeverinë dhe për të ndryshuar pushtetin me imponimin e dhunës, që s’ka për të ndodhur asnjëherë, për asnjë arsye”, u shpreh kryeministri. Në mbyllje, ai vuri inat se ky lloj raportimi mediatik krijon një deformim të rëndë në opinionin publik. “Por rëndon në mënyrë dramatike në psikologjinë e qytetarëve, krijon idenë se këtu po digjet e gjithë Shqipëria”, përfundoi Rama.