Trump shpreh vullnetin për një samit trepalësh me Putinin dhe Xi Jinping në Kinë

Kreu i Shtëpisë së Bardhë, Donald Trump, deklaroi gjatë ditës së hënë se është i hapur për të zhvilluar një takim të përbashkët me homologun rus Vladimir Putin dhe atë kinez Xi Jinping muajin e ardhshëm në territorin kinez, duke dhënë kështu konfirmimin për aludimet e përhapura mediatike rreth një organizimi të mundshëm në kuadër të samitit të Azi-Paqësorit. Sipas Trump, fokusi kryesor i një tryeze të tillë të nivelit të lartë do të jetë çarmatimi bërthamor, megjithëse nuk ka përjashtuar mundësinë që në axhendë të përfshihet edhe konflikti në Ukrainë. Në një bashkëbisedim me gazetarët, kur u pyet drejtpërdrejt nëse një samit i tillë do t'i kushtohej situatës ukrainase, ai e zhvendosi vëmendjen te prioritetet e tjera. “Do ta bëja këtë, jo aq shumë për Ukrainën, sepse Rusia, sinqerisht, ka qenë e qetë me Ukrainën. Nuk kanë bërë shumë”, u shpreh ai. Duke shtuar më tej detajet rreth qëllimit të takimit, Trump nënvizoi: “Do të takoheshim për të diskutuar mbi armët bërthamore dhe çarmatimin bërthamor”. I pyetur sërish nëse fati i Ukrainës do të trajtohet mes tre liderëve, ai premtoi angazhim maksimal për të arritur paqen, duke thënë se do të bëjë “gjithçka që mundem për t’i dhënë fund luftës”. Metropoli kinez Shenzhen pritet të mirëpresë samitin e Grupit të Bashkëpunimit Ekonomik Azi-Paqësor (APEC) gjatë dates 18-19 nëntor, një organizim ku Shtetet e Bashkuara, Kina dhe Rusia janë palë anëtare. Megjithatë, zëdhënësi i Kremlinit, Dmitry Peskov, vuri theksin te mungesa e përgatitjeve konkrete, duke shtuar se “askush nuk ka diskutuar ose paraqitur asnjë propozim apo marrëveshje thelbësore, as në lidhje me vetë takimin, as me axhendën dhe përmbajtjen e tij të mundshme”. Peskov gjithashtu theksoi se “një zgjidhje përfundimtare është e pamundur pa pjesëmarrjen e dikujt nga Kievi që është i përgatitur të marrë përsipër përgjegjësinë”. Në krahun tjetër, Vladimir Putin ka refuzuar në mënyrë të pëërsëritur një takim të drejtpërdrejtë me Volodymyr Zelenskyn deri në arritjen e një marrëveshjeje paqeje, duke vënë në pikëpyetje legjitimitetin e liderit ukrainas për të firmosur dokumente pas skadimit të mandatit të tij pesëvjeçar nën kushtet e ligjit ushtarak. Duke iu bashkuar toneve kritike të ditëve të fundit ndaj presidentit ukrainas, Trump përsëriti të hënën qëndrimin e tij se është “koha që dikush tjetër të negociojë në emër të Ukrainës”. “Zelensky nuk e di se për çfarë po flet”, u shpreh Trump gjatë komentimit të deklaratave të zyrtarit ukrainas. “Të jem i sinqertë, mendoj se është koha që dikush tjetër të negociojë në emër të Ukrainës”, përfundoi ai.