Ndërhyrja e RENEA-s në bulevard, Albert Nushi: Pati rrezik real për jetën e efektivëve në terren

Shefi i Sektorit të Menaxhimit në Departamentin e Sigurisë Publike, Albert Nushi, ka dalë në një deklaratë për mediat ku ka sqaruar arsyet e angazhimit të forcave speciale RENEA gjatë protestës së një dite më parë në bulevard, duke theksuar se kjo masë u mor për shkak të rrezikut të drejtpërdrejtë për jetën e efektivëve. Në fjalën e tij, Nushi bëri të ditur se Policia e Shtetit prej gjashtë ditësh përballet me sulme të vazhdueshme dhe të paprecedenta nga grupe personash të maskuar. Këta individë kanë përdorur kundër forcave të rendit gurë, pllaka guri, sfera dhe vida metalike, sende të forta, lëndë piroteknike e bomba molotov, duke dëmtuar gjithashtu institucione shtetërore, të drejtësisë, bankare, si dhe pronën publike e private. Sipas tij, situata është rënduar edhe nga thirrjet e përditshme në rrjetet sociale dhe platformat online për vrasjen e punonjësve të policisë dhe djegien e automjeteve të tyre. Gjatë ditës së djeshme, në sallën operative të Drejtorisë Vendore të Policisë Tiranë mbërriti një telefonatë urgjente, e cila sinjalizonte se mes protestuesve kishte elementë të armatosur që po qëllonin me armë zjarri gjatë sulmeve me lëndë piroteknike. Përballë kësaj shkalle të lartë dhune dhe rrezikut të konfirmuar për jetën e efektivëve të cilët shërbejnë të paarmatosur, strukturat e RENEA-s dolën në terren në përputhje me ligjin për tubimet. Gjatë operacionit, strukturat e specializuara përdorën në mënyrë të kufizuar edhe pajisjet speciale për menaxhimin e turmave, duke iu përgjigjur shkallës së rrezikut. Nushi informoi se gjatë këtyre zhvillimeve janë shoqëruar 54 shtetas, ndërsa 27 të tjerë janë arrestuar pasi janë përfshirë në aktet e dhunës. Gjatë kontrolleve janë sekuestruar armë, si një karikator me fishekë dhe bomba molotov, ndërsa veprime hetimore janë ndërmarrë edhe në qytetet e Shkodrës dhe Vlorës. Duke iu drejtuar qytetarëve, zyrtar policor u bëri thirrje protestuesve që të distancohen nga elementët e dhunshëm dhe të respektojnë të drejtën kushtetuese për tubime paqësore. Ai kujtoi se ligji ndalon rreptësisht përdorimin e maskave, shalleve apo mjeteve të tjera që fshehin identitetin, ndërsa theksoi se të gjithë individët e dhunshëm po identifikohen pavarësisht mbulimit të fytyrës. Në fund të deklaratës, Nushi i quajti të pavërteta lajmet e përhapura se në operacion janë përfshirë oficerë të ardhur nga strukturat e policive të tjera, duke sqaruar se këto pretendime janë të rreme dhe synojnë të shfrytëzojnë ndjenjat nacionaliste.