UEFA vendos: Gjyqtari anglez do të ndajë drejtësinë në supersfidën PSG – Barcelonë

Janë zbardhur detajet zyrtare për sfidën e madhe të së martës në Ligën e Kampionëve mes Paris Saint-Germain dhe Barcelonës, ku tashmë është caktuar edhe arbitri kryesor që do të drejtojë këtë takim spektakolar. Organi qeverisës i futbollit evropian, UEFA, i ka besuar drejtimin e kësaj përballjeje të rëndësishme gjyqtarit të njohur anglez, Michael Oliver. Në fushën e gjelbër, Oliver do të asistohet nga bashkatdhetarët e tij Stuart Burt dhe James Mainwaring, ndërsa roli i gjyqtarit të katërt i është besuar Robert Jones. Ndërkohë, kontrolli i sistemit VAR do të menaxhohet nga italianët Marco Di Bello dhe Daniele Chiffi. Arbitri anglez gëzon një eksperiencë të pasur në ndeshje të nivelit më të lartë ndërkombëtar, ndërsa kujtohet nga publiku vendas edhe për gjykimin e finales së 'play-off'-it drejt Kampionatit Botëror ndërmjet Kosovës dhe Turqisë, e cila ishte zhvilluar në Prishtinë. Kujtojmë se kjo superpërballje evropiane do të zhvillohet në stadiumin “Parc des Princes”, me fillim nga ora 21:00.