Tensioni në Tiranë / Eksperti zbulon ndikimin e huaj dhe thirrjet për terrorizëm: Qeveria të bëjë publike emrat e organizatorëve!

Eksperti i kriminalistikës, Ervin Karamuço, ka ngritur alarmin se protestat e dhunshme të zhvilluara në kryeqytet po ndikohen nga faktorë të huaj, të cilët synojnë t'i japin një rrjedhë të dhunshme tubimeve për interesat e tyre gjeopolitike. I ftuar në një studio televizive, Karamuço theksoi se metodologjia e përdorur në Tiranë është e ngjashme me atë të kryeqyteteve të tjera evropiane, duke shtuar se Rusia dhe boshti sllav po përpiqen t'i shfrytëzojnë këto situata në Ballkan. Sipas tij, në këto ngjarje mund të ketë edhe zgjatime të lëvizjes së ashtuquajtur “antifa”, ndaj i bëri thirrje ekzekutivit që të lërë mënjanë teoritë dhe të zbardhë me emra konkretë se kush fshihet pas skenarit të dhunës. Eksperti i sigurisë solli në vëmendje edhe ngjarjet e protestës së djeshme, ku bëri të ditur se brenda turmës janë konstatuar municione, ndërsa në sallën operative të Policisë së Shtetit është regjistruar një telefonatë për të shtëna me armë zjarri, çka solli edhe rrethimin e Kryeministrisë nga forcat speciale RENEA. Ai u ndal gjithashtu te komunikimet në platformën “Telegram”, ku sipas tij janë konstatuar thirrje të hapura për akte terroriste, duke e bërë situatën tejet të rrezikshme për rendin publik dhe sigurinë kombëtare. Karamuço kërkoi nga institucionet transparencë të plotë për të identifikuar drejtuesit e këtyre grupeve që synojnë përmbysjen e rendit kushtetues. Në përmbyllje të analizës së tij, ai bëri thirrje për një ndarje të qartë mes protestave paqësore dhe akteve të dhunës kundër institucioneve, bizneseve e policëve, duke paralajmëruar se paqartësitë dhe tensionet e deritanishme rrezikojnë të prodhojnë përplasje me pasoja tragjike.